İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 155 Hüküm no: 159 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın çocuğu Halil için boşandığı kocası Mustafa Beşe b. Mehmed’den nafaka alması Mahmiye-i İstanbul’da Müftü Ali Çelebi mahallesi sâkinelerinden bâ‘isetü hâze’l-kitâb Emine bt. Mustafa nâm hatun meclis-i şer‘-i şerîf-i enver ve mahfil-i dîn-i münîf-i ezherde takrîr-i kelâm ve ta‘bîr ani’l-merâm edip zevc-i mutallıkım işbu hâzır bi’l-meclis Mustafa Beşe b. Mehmed’in firâşından hâsıl ve benden mütevellid sadrî sagīr oğlum ve hâlâ bi-hakkı’l-hıdâne hacr u terbiyemde olan Halil nâm sagīrin nafaka ve kisve ve sâir levâzımesi için babası mezbûr Mustafa üzerine kadr-ı ma‘rûf akçe farz ve takdîr olunmak matlûbumdur dedikde hâkim-i muvakkı‘-ı sadr-ı kitâb tûbâ leh ve hüsnü-meâb hazretleri dahi sagīr-i mezbûrun nafaka ve kisve ve sâir levâzimesi için babası mezbûr Mustafa Beşe üzerine târih-i kitâbdan yemvî yedişer akçe nafaka farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisve ve sâir levâzımesi için harc u sarfa ve lede’l-iktizâ istidâneye ve inde’z-zafer babası mezbûr Mustafa Beşe üzerine rücû‘a mezbûre Emine’ye izin vermeğin mâ-vaka‘a bi’t-taleb ketb olundu. Fî evâhiri Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, el-Hâc Abdi b. Mahmud, Ali Çelebi b. Bâli, Hüseyin Beşe b. Mustafa.