İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 156 Hüküm no: 160 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Himmet’in kendisini yaralayan gemici Yani v. Dimitri’ye karşı açtığı davadan feragat etmesi Mahmiye-i İstanbul’da Müftü Ali Çelebi mahallesi sâkinlerinden Ahmed b. Himmet nâm kimesne meclis-i şer‘-i şerîf-i enver ve mahfil-i dîn-i münîf-i ezherde gemici tâifesinden bâ‘is-i hâze’l-kitâb Yani v. Dimitri nâm zimmî muvâcehesinde ikrâr ve takrîr-i kelâm edip mezbûr Yani târih-i kitâbdan dört sene mukaddem vilâyet-i Rumeli’nde Koran İskelesi’nde gāib ani’l-meclis Panayot nâm reisin çekleve ta‘bîr olunur sefînesinde mezbûr Yani ile ma‘an gemici iken tüfenği ile hatâen yüzümden urub beni mecrûh etmişdi, mûceb-i şer‘îsini mezbûr Yani’den taleb ve da‘vâ eylediğimde ol dahi husûs-ı mezkûru bi’l-külliye inkâr etmişdi. El-hâletü hâzihî da‘vâ-yı mezkûremden fâriğa olup husûs-ı mezkûre ve mâ-tehaddese minhuya müte‘allika âmme-i da‘vâdan mezbûr Yani’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fî gurreti Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris, Hüseyin Çelebi b. Mustafa, Ali Çelebi b. Bâli.