İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 156 Hüküm no: 161 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahi Osman Bey b. Abdülgani b. Ahmed’in Kayyum el-Hac Mustafa b. Ömer’e kefalet sebebiyle olan borcunu tecil etmesi Fi’l-asl vilâyet-i Anadolu’da Maraş sancağında Elbistan kazâsına tâbi‘ Pınarbaşı nâm karye ahâlîsinden olup hâlâ Bolu kazâsına tâbi‘ Sultan nâm karyede mutavattın zümre-i sipâhiyândan Osman Bey b. Abdülgani b. Ahmed nâm kimesne meclis-i şer‘-i şerîf-i enverde mahmiye-i İstanbul’da Keçeci Piri mahallesinde sâkin işbu râfi‘ü’l-kitâb Kayyûm el-Hâc Mustafa b. Ömer nâm kimesne mahzarında ikrâr-ı tâm ve takrîr-i kelâm edip mezbûr el-Hâc Mustafa’nın sâbıkā Kostaniçe kādısı olan gāib ani’l-meclis Mahmud Efendi b. Ali zimmetinde cihet-i karz-ı şer‘îden yüz esedî guruş ve yedinden iştirâ ve kabz eylediği bir mushaf-ı şerîf hediyesinden dahi kırk beş esedî guruş ki cem‘an yüz kırk beş esedî guruş hakkı olup meblağ-ı merkūm ben emr ve kabûlü hâviye kefâlet-i sahîha-i şer‘iyye ile kefil olmağla meblağ-ı mezbûr merkūm el-Hâc Mustafa’ya bi-hükmi’l-kefâle zimmetinde edâsı lâzım deynim olup lâkin hâlden edâya iktidârım olmayıp te’cîle tâlib olduğumda ol dahi târih-i kitâbdan yetmiş beş gün tamâmına değin bi’t-taleb te’cîl etmeğin meblağ-ı mezbûr yüz kırk beş guruş mezbûr el-Hâc Mustafa’ya zimmetimde mü’eccel deynimdir dedikde gıbbe’t-tasdîki’ş-şer‘î mezbûr el-Hâc Mustafa dahi meclis-i şer‘de Abdurrahim b. Hüseyin Efendi huzûrunda ikrâr u i‘tirâf edip ba‘de tamâmi’l-ecel meblağ-ı mezbûr yüz kırk beş guruşu mezbûr Osman Bey’den taleb ve da‘vâ ve ahz u kabza ve bana îsâle tarafımdan merkūm Abdurrahim Efendi’yi vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi kabûl etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: el-Hâc Hüseyin b. İbrahim, Mehmed b. Musli, Yusuf Efendi, Mustafa Efendi b. Nurullah, İbrahim Çelebi b. Halil.