İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 157 Hüküm no: 162 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oniye bt. Miro’nun kendisini boşayan Bağcı Mustafa Beşe b. Abdullah’dan mehir ve nafakasını alarak zimmetini ibra etmesi Mahmiye-i İstanbul’da Fenerkapısı dâhilinde Abdi Subaşı mahallesi sâkinelerinden Oniye bt. Miro nâm Nasrâniye ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i mutallıkı işbu bâ‘isü’l-vesîka Bâğcı Mustafa Beşe b. Abdullah nâm kimesne mahzarında ikrâr ve takrîr-i kelâm edip mezbûr Mustafa Beşe zevcim olup târih-i kitâb günü beni bâyinen tatlîk etmekle zimmetinde mütekarrir ve ma‘kūdün-aleyh beş yüz akçe mehr-i müeccelimi ve nafaka-i iddet-i ma‘lûmem ve me’ûnet-i süknâm için bi’t-terâzî ta‘yîn olunan beş yüz akçe ki cem‘an bin akçe hakkımı mezbûr Mustafa Beşe bana def‘ ve teslîm, ben dahi yedinden tamâmen ahz u kabz eylediğimden sonra hukuk-ı zevciyyete müte‘allika âmme-i da‘vâdan zevcim mezbûr Mustafa Beşe’nin zimmetini ibrâ-i âm ile ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâlis min-Saferi’l-hayr li-sene mi’e ve elf. Şuhûdü’l-hâl: el-Hâc Abdullah b. Mehmed, el-Hâc Süleyman Çukadâr, Mustafa b. Mehmed, İbrahim Çelebi b. Ahmed, Mehmed b. Hasan.