İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 157 Hüküm no: 163 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lisbe v. Rumbik’in kardeşi Koti’nin ölümüne sebep olan Bekdaş b. Mahmud ile diyet konusunda sulh olması Bâğcı tâifesinden olup mahmiye-i İstanbul’da Balatkapısı kurbünde el-Hâc İsa mahallesinde sâkin Lisbe v. Rumbik nâm zimmî meclis-i şer‘-i şerîf-i enverde bâ‘isü’l-vesîka Bekdaş b. Mahmud mahzarında ikrâr ve takrîr-i kelâm edip bundan akdem karındaşım Koti nâm zimmî mezbûr Bekdaş’ın hizmetkârı olup karındaşım mezbûru târih-i kitâbdan beş gün mukaddem kendi bâğhânesinin duvarı üzerine çıkarıp oluk kodururken bâğhâneye muttasıl Osman nâm kimesnenin menzili yıkılıp karındaşım mezbûru basdırıp ondan nâşî hâlik olmağla bundan akdem mezbûrdan karındaşım mezbûrun dem [u] diyetini taleb ve da‘va eylediğimde ol dahi bi’l-külliye inkâr etmekle beynimizde münâza‘ât-ı kesîre vukū‘undan sonra mezbûr Bekdaş benimle da‘vâ-yı mezkûremden on bir guruş üzerine sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr on bir guruşu mezbûrun yedinden ahz u kabz edip ba‘de’l-yevm husûs-ı mezkûre ve dem ü diyetine müte‘allika âmme-i da‘vâdan mezbûr Bekdaş’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Mehmed Bey b. Mahmud, Hacı Hüseyin b. Mehmed, Mübâşir Hasan Beşe, Ali b. Ramazan, İbrahim Çelebi b. Ahmed, Mehmed b. Derviş.