İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 161 Hüküm no: 166 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Abdullah’ın boşandığı kocası Mustafa Çelebi b. Ahmed’den mehri ile kendisi ve çocuğu için nafaka alması Mahrûse-i Galata muzâfâtından kasaba-i Tophane’da Kılıç Ali Paşa mahallesinde sâkine zâtı Abdülgani Efendi b. Ahmed ve Ahmed Çelebi b. Ebûbekir ta‘rîfiyle mu‘arrefe olan Ümmühânî bt. Abdullah nâm hatun meclis-i şer‘-i şerîf-i enverde zevc-i mutallıkı olan işbu râfi‘ü’l-kitâb Mustafa Çelebi b. Ahmed mahzarında ikrâr-ı tâm ve takrîr-i kelâm edip mezbûr Mustafa Çelebi bundan akdem beni bâyinen tatlîk etmekle zimmetinde mütekarrir ve ma‘kūdün-aleyh mehr-i müeccelim olan bin altı yüz akçeyi ve nafaka-i iddet ve me’ûnet-i süknâm için bi’t-terâzî ta‘yîn olunan üç yüz akçe ki min haysü’l-mecmû‘ bin dokuz yüz akçeyi bana def‘ ve teslîm, ben dahi yedinden bi’t-tamâm ahz u kabz edip ve mezbûrun firâşından hâsıl ve benden mütevellid sulbî sagīr oğlum Mesud’un nafaka ve kisve ve sâir levâzım-ı mühimmesi için bi’t-terâzî târih-i kitâbdan beher yevm beşer akçe mezbûr Mustafa bana verip ben dahi sagīr-i mezbûru ber-vech-i muharrer infâk ve iksâya ta‘ahhüd etdiğimden sonra hukuk-ı zevciyyete ve târih-i kitâba gelince beynimizde cereyân eden cemî‘ ahz u i‘tâ ve mu‘âmelât-ı şettâ ve hukuk-ı ma‘lûme ve mechûleye müte‘allika âmme-i de‘âvî ve mütâlebâtdan mezbûr Mustafa Çelebi’nin zimmetini ibrâ-i âmla ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’s-sâdis ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Mehmed Efendi b. Abdurrahman, Mahmud Efendi b. Ahmed, Hasan b. Mehmed, el-Hâc Ali b. Abdullah, el-Hâc Abdi Nevbetçi.