İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 162 Hüküm no: 168 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canfeda bt. Abdullah’ın mallarını Halil Çelebi b. Hasib’e hibe etmesi Mahmiye-i İstanbul’da Beyceğiz mahallesi sâkinelerinden olup zâtı ma‘rifet-i şer‘iyye ile ârifân mahalle-i mezbûre sükkânından Hüseyin Çelebi b. Receb ve Musa Çelebi b. Mustafa nâm kimesneler ta‘rîfleriyle mu‘arrefe olan Canfeda bt. Abdullah nâm hatun meclis-i şer‘-i şerîf-i enverde bâ‘is-i hâze’l-kitâb Halil Çelebi b. Hasib nâm kimesne mahzarında ikrâr ve takrîr-i kelâm edip eşyâ-i memlûkemden dört yastık ve iki minder ve iki yorgan ve iki tencere ve üç sahan ve bir sini ve bir leğen ma‘a ibrik ve iki kilim ve bir yan keçemi ve sâir kalîl ve kesîr ism-i mâl ıtlâk olunur her neyim var ise mezbûr Halil Çelebi’ye hibe-i sahîha-i şer‘iyye ile hibe ve temlîk, ol dahi meclis-i hibede ittihâb ve tesellüm ve kabz u kabûl eyledikden sonra eşyâ-i mezkûrede benim kat‘â alâka ve medhalim kalmadı, cümlesi mezbûr Halil Çelebi’nin emlâk-ı mevhûbesi olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâdis min-Rebî‘ülevvel [li-sene mi’e ve elf]. Şuhûdü’l-hâl: Hüseyin Çelebi b. Receb, Musa Çelebi b. Mustafa, Osman Çelebi b. Hüseyin, İbrahim Çelebi b. Ahmed, Hüseyin b. Mustafa.