İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 162 Hüküm no: 169 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. el-Hac Mehmed’in varisleri olan Yorgancı Mustafa Ağa ve Kerime Hatun’un tereke konusunda Halil Ağa b. el-Hac Mustafa ile sulh olmaları Mahmiye-i İstanbul’da Haydarhane mahallesinde sâkine iken bundan akdem vefât eden Âişe bt. el-Hâc Mehmed b. Abdullah nâm hâtûnun li-ebeveyn dayısı evlâdı olmağla zî-rahm cihetinden hasren vârisleri olan Yorgancı Mustafa Ağa ve Kerime Hatun veledey Mehmed b. Abdullah taraflarından husûs-ı âti’l-beyâna vekîl olduğu mezbûre Kerime Hâtûn’un zâtını ma‘rifet-i şer‘iyye ile ârifân Süleyman Ağa b. Abdullah ve Mehmed Çelebi b. Mehmed şehâdetleriyle şer‘an sâbit olan Ali Efendi b. Mustafa meclis-i şer‘-i şerîf-i enverde mahalle-i mezbûrede sâkin bâ‘is-i hâze’l-kitâb Halil Ağa b. el-Hâc Mustafa nâm kimesne tarafından ikrâr-ı âtiyi tasdîka vekîl-i müsecceli olan el-Hâc Abdi Çelebi b. Receb mahzarında ikrâr-ı tâm ve takrîr-i kelâm edip müvekkilân-ı mezbûrân Mustafa Ağa ve Kerime Hâtûn’un mûriseleri mezbûre Âişe Hatun merkūm Halil Ağa’nın menzilinde vefât etmekle merkūm Halil Ağa muhallefâtına vaz‘-ı yed ve kabz edip ba‘dehû muhallefât-ı mezbûreyi bi-tamâmihâ mezbûr Mustafa Ağa ve Kerime Hâtûn’a def‘ ve teslîm, onlar dahi ahz u kabz etmişlerdi, lâkin mezbûre Âişe Hâtûn’dan hayâtında mahalle-i mezbûrede vâki‘ ma‘lûmü’l-hudûd mülk menzilini merkūm Halil Ağa semen-i ma‘lûma iştirâ ve kabz etmekle hâlâ mezbûrân Mustafa Ağa ve Kerime Hatun menzil-i mezbûr semeninden senin zimmetinde üç yüz guruş bâkī kaldı deyü merkūm Halil Ağa’dan taleb ve da‘vâ etdiklerinde beynlerinde ba‘de’n-nizâ‘ muslihûn tavassut edip merkūm Halil Ağa mezbûrân Mustafa Ağa ve Kerime Hâtûn’la yüz guruş üzerine sulh olduklarında onlar dahi sulh-ı mezbûru kabûl ve bedel-i sulh olan meblağ-ı mezbûr yüz guruşu merkūm Halil Ağa yedinden ahz u kabz etdiklerinden sonra menzil-i mezbûre ve bi’l-cümle müteveffâ-yı mezbûre Âişe Hâtûn’un kalîl ve kesîr ve sâir ism-i mâl ıtlâk olunur cemî‘ terekesine müte‘allika âmme-i da‘vâdan mezbûr Halil Ağa’nın zimmetini ibrâ-i âmla ibrâ ve ıskāt eylediler, min ba‘d da‘vâ ve nizâ‘ları kalmamışdır dedikde gıbbe’t-tasdîki’l-vicâhî mâ-vaka‘a bi’t-taleb ketb olundu. Fi’l-yevmi’s-sânî min-Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Mustafa, Mehmed Çelebi b. Mehmed Yastıkçı, Solak Hüseyin b. Mustafa, Mehmed Çelebi b. ( ) Yastıkçı, Mehmed Çelebi b. Mehmed, Süleyman Ağa b. Abdi, Abdi Çelebi, Mehmed Dede b. Kara Hüseyin.