İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 163 Hüküm no: 170 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Bey b. İsmail’in Hasan Paşa’nın oğlu Mustafa Ağa’daki alacağının tahsilini istemesi İşbu bâ‘isü’l-kitâb Mahmud Bey b. İsmail meclis-i şer‘-i şerîf-i enverde ümerâ-i deryâdan olan emîrü’l-ümerâ-i fihâm Hasan Paşa’nın oğlu Mustafa Ağa muvâcehesinde üzerine da‘vâ ve takrîr-i kelâm edip mîr-i müşârun-ileyhin Yemiş İskelesi’nde vâki‘ olup kendiden istîcâr eylediğim ma‘lûmü’l-hudûd yemişçi dükkânı bi-emri’llâhi te‘âlâ muhterik oldukda mezbûr Mustafa Ağa babası mezkûrun zikr olunan dükkânını sen mâlından tecdîd ve ta‘mîr eyle, masrûfunu sana edâ edeyin deyü bana emr etmekle ben dahi mezkûrun emriyle dükkân-ı mezbûru müceddeden binâ ve masrûfumu hesâb eylediğimde sarfım on sekiz bin yedi yüz akçeye bâliğ ve mezkû[r] masrûfum ma‘lûmu ve makbûlü olup bana edâ ve teslîm iltizâm etmeğin mezbûr edâdan imtinâ‘ eder, suâl olunup emrine binâen temessük matlûbumdur dedikde gıbbe’s-suâl mezbûr Mustafa Ağa cevâbında fi’l-hakīka ber-vech-i muharrer meremmeti ve masrûfu ancak on beş bin dokuz yüz yirmi akçe idiğini ikrâr lâkin ziyâdeyi inkâr ve meblağ-ı mezbûrdan dahi elli beş guruşu kendüye edâ etmişimdir deyü ol mikdâra def‘le mukābele edicek, gıbbe’l-istintâk ve’l-inkâr evvelâ müdde‘î-i mezbûr husûs-ı mezbûrda yemîn ile musaddak ümenâdan olmağla meblağ-ı mezbûr on sekiz bin yedi yüz akçeyi kâmilen dükkân-ı mezbûrun ta‘mîrine sarf etdiğine ve sâniyen meblağ-ı mezbûrdan elli guruşu ahz u kabz etmediğine bi’t-taleb ve’l-iltimâs yemîn teklîf olundukda ol dahi hasbe’l-mes’ûl yemîn billâhi te‘âlâ etmeğin mûcebiyle meblağ-ı mezbûr on sekiz bin yedi yüz akçeyi emrine binâen müdde‘î-i mezbûra edâ ve teslîme mezkûr Mustafa Ağa’ya [36a] tenbîh olunup mâ-vaka‘a bi’t-taleb ketb olundu. Fi’l-yevmi’s-sânî min-Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed b. Hüseyin, Ali b. Bâli, Ebûbekir b. Mahmud.