İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 164 Hüküm no: 171 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Hüseyin Çavuş Vakfı’na ait olan Küçükköy’deki ev ve bağın tasarrufunun Panko v. Duka’nın ölümüyle küçük oğluna verilmesi Ashâb-ı hayrâtdan Sarı Hüseyin Çavuş Vakfı’na hâlâ mütevellî olan Mahmud Çelebi b. Mehmed meclis-i şer‘-i şerîf-i enverde Havâss-ı Refî‘a muzâfâtından Küçükköy’de sâkin iken bundan akdem hâlik olan Panko v. Duka’nın evlâd-ı sıgārının vasiyy-i muhtârları olan İşora v. Duka nâm zimmî muvâcehesinde bi’t-tevliye takrîr-i kelâm ve ta‘bîr ani’l-merâm edip hâlik-i mezbûr mukaddemâ hâl-i hayâtında vakf-ı mezbûr mâlından mütevellî-i sâbık Mustafa Çelebi b. Mahmud’dan istidâne ve kabz eylediği iki yüz elli guruş mukābelesinde karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzil [ve] bâğını bi-tarîki’l-istiğlâl bey‘ ve senede otuz guruşa istîcâr edip kendi hayâtda oldukça beher sene icâresi ve ba‘de helâkihî dahi bir sene mukaddeme gelince dahi icâre-i mezkûre cânib-i vakfa teslîm olunmuşdu, lâkin zikr olunan menzil ve bağdan gayrı hâlik-i mezbûrun ism-i mâl ıtlâk olunur şeyi olmayıp onlar bey‘ ve semenlerinden edâ-i deyn olunmak üzere hükm-i hâkimü’ş-şer‘ lâhık ve hüccet-i şer‘iyye tahrîr olunmağla zikr olunan menzil [ve] bağ üç seneden beri müzâyede olunup rağabât-ı nâs bi’l-külliye münkatı‘a olunup yüz elli guruşda karâr ve ziyâde ile tâlib-i âhar zuhûr etmeyip bi’l-izni’ş-şer‘î mârru’z-zikr menzil ve bağ ol mikdâra bey‘ ve kabz-ı semen olunmuşdu. El-hâletü hâzihî vasiyy-i mezbûr semen-i mezkûr yüz elli guruşu vakıf için bana teslîm, ben dahi vakf-ı mezbûr için yedinden alıp kabz eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî evâhiri’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Hüseyin, Ali b. Bâli ve gayruhüm.