İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 164 Hüküm no: 172 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aslan’ın oğulları Soti, Kostantin, Panayot, Yanaki ve Bağram’ın Mirahor mahallesindeki müşterek evlerini istiğlal yoluyla Ahmed Bey Vakfı’na satmaları Mahmiye-i İstanbul’da Mirahor mahallesinde sâkin Soti ve Kostantin ve Panayot ve Yanaki ve Bağram ebnâ-i Aslan nâm zimmîler meclis-i şer‘-i şerîf-i enverde merkūm Ahmed Bey Vakfı’na bi’l-fi‘il mütevellî olan Ahmed Çelebi b. İsmail mahzarında her biri ikrâr ve takrîr-i kelâm edip mahalle-i mezbûrda vâki‘ bir tarafdan Asvador ve bir tarafdan Nesli ve bir tarafdan Kebeci menzilleri ve bir tarafdan tarîk-i âm ile mahdûd beynimizde müşterek büyûtu müştemil mülk menzilimizi bi-cümleti’t-tevâbi‘ mütevellî-i merkūma bi-tarîki’l-istiğlâl yüz altmış beş guruşa bey‘ ve teslîm, ol dahi iştirâ ve tesellüm etdikden sonra meblağ-ı mezbûr yüz altmış beş guruşu yedinden mâl-ı vakıfdan ahz u kabz eyledik, yine mütevellî-i mezbûr menzil-i mezbûru târih-i kitâbdan bir sene tamâmına değin ba‘de’t-tahliye ve’t-tekābuz bize yirmi bir guruş ile beş paraya îcâr ve tesellüm, biz dahi istîcâr ve kabûl ve kabz edip ve asl-ı mâl-ı mezbûrdan ve ücret-i lâzımeden herbirimiz âharın zimmetine lâzım gelen meblağa bi’l-emr ve’l-kabûl kefîl ve zâmin olduk dediklerinde gıbbe’t-tasdîki’l-vicâhî mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: Şeyh Ahmed Efendi b. Mehmed, Seyyid Abdullah Efendi, Mehmed Çelebi Haytakzâde, Mehmed Çelebi Attâr, Mustafa.