İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 165 Hüküm no: 174 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Timurhan bt. Abdullah’ın terekesinden kocası Ahmed b. Veli’nin alacağını tahsil etmesi Mahmiye-i İstanbul’da Çukur mahallesinde sâkine iken bundan akdem vefât eden Timurhan bt. Abdullah nâm hâtûnun verâseti zevci Ahmed b. Veli ile sagīre kızı Fâtıma’ya munhasıra olduğu mütehakkık oldukdan sonra mezbûr Ahmed meclis-i şer‘-i şerîfde sagīre-i mezbûrenin vasîsi Abdülkadir Efendi mahzarında üzerine da‘vâ ve takrîr-i kelâm edip zevcem müteveffâ-yı merkūme Timurhan zimmetinde cihet-i karzdan yüz guruş hakkım olup hatta hayâtında ikrâr dahi etmekle mezbûre Timurhan mahmiye-i İstanbul’da Eyyüb-i Ensârî kapısı dâhilinde Mustafa Paşa-yı Atîk mahallesinde vâki‘ ma‘lûmü’l-hudûd mülk bağhâneden yedimde olan hüccet nâtık olduğu üzere üç yüz yirmi sehm hissesini altı ay mukaddem hâl-i hayâtında yüz guruşa bey‘-i kat‘î ile bana bey‘ ve teslîm, ben dahi ba‘de’l-iştirâ ve’t-tesellüm semeni olan yüz guruşu bana zimmeti olan meblağ-ı mezbûr yüz guruşa takās, ben dahi mukāssa ve kabûl edip mülk-i müşterâm olmuş iken vasiyy-i mezbûr terekeden olmak üzere sagīre-i mezbûre için hisse talebiyle mu‘âraza eder, suâl olunsun dedikde gıbbe’s-suâl vasiyy-i mezbûr cevâbında kaziyye ( ) mezbûrdan müdde‘âsını mübeyyin beyyine taleb olundukda udûl-ı müslimînden olup Terkos nâhiyesinde Kurd nâm karyeden İmâm Mehmed Halîfe b. Ali ve Mehmed b. Osman nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûre Timurhan hâl-i hayâtında zikr olunan bağhâneden üç yüz yirmi sehm hissesini müdde‘î-i mezbûra yüz guruşa bizim huzûrumuzda bey‘ ve teslîm ve semenini deyni olan yüz guruşa takās, mezbûr Ahmed dahi iştirâ ve tesellüm ve mukāssa ve kabûl etmişdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle vasiyy-i merkūm bî-vech mu‘ârazadan men‘ olunup mâ-vaka‘a bi’t-taleb ketb olundu. Fî evâili Saferi’l-hayr li-sene mi’e ve elf. Şuhûdü’l-hâl: Mehmed Efendi b. Hüseyin, Şaban Bey b. ( ), Mehmed b. Mahmud, Mahmud b. Ahmed, Receb b. Ali.