İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 166 Hüküm no: 175 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Hasan b. Kanber’in varislerinden olan kızı Saliha’nın terekeye el koyan kardeşi el-Hac Şaban’dan sulh yoluyla hissesini alması Mahmiye-i İstanbul’da Derviş Ali mahallesi sükkânından olup bundan akdem fevt olan el-Hâc Hasan b. Kanber’in verâseti zevce-i metrûkesi Âişe bt. Mehmed ile kebîr oğlu el-Hâc Şaban ve sulbiye kebîre kızı Âişe ve Saliha ve Alime’ye munhasıra olduğu şer‘an zâhir ve müte‘ayyin oldukdan sonra mezbûre Saliha ba‘de’t-ta‘rîfi’ş-şer‘î meclis-i şer‘-i şerîf-i enverde karındaşı olup tereke-i müteveffâ-yı mezbûre vâzı‘u’l-yed olan mezbûr el-Hâc Şaban mahzarında ikrâr-ı tâm ve takrîr-i kelâm edip babam ve mûrisim müteveffâ-yı mezbûrun mahmiye-i İstanbul’da ve medîne-i Eyüb el-Ensârî’de -radıye anhü’l-bârî- vâki‘ üç bâb menzil ve dükkân ve ber-mûceb-i defter-i kassâm nukūd ve sâir terekeden ve menâzil ve dekâkîn icârâtından bi-hasebi’l-irsi’ş-şer‘î bana isâbet eden hisse-i şer‘iyyemi taleb ve da‘vâ eylediğimde beynimizde ba‘de’l-münâza‘a muslihûn tavassut edip mezkûr el-Hâc Şaban ile beynimizde mukaddemâ bana def‘ ve teslîm eylediği elli guruşdan mâ‘adâ altmış beş guruş üzerine akd-i müsâlaha olundukda ben dahi sulh-ı mezbûru kabûl ve bedel-i sulh olan meblağ-ı mezbûr altmış beş guruşu yedinden alıp kabz ve tesellüm edip vâlidimden bi’l-irsi’ş-şer‘î bana isâbet eden hisseme müte‘allika âmme-i de‘âvî ve muhâsamât ve eymân ve mütâlebâtdan mezbûr el-Hâc Şaban’ı ibrâ-i âmm-ı kātı‘u’n-nizâ‘la ibrâ ve ıskāt eyledim, mezbûrda on iki miskāl bir çift altın bilezikden gayrı aslâ ve kat‘â da‘vâ ve nizâ‘ım kalmamışdır dedikde gıbbe’t-tasdîki’l-mu‘teberi’l-vicâhî mâ-hüve’l-vâkı‘ bi’t-taleb ketb olundu. Fi’l-yevmi’s-sâlis min-Saferi’l-hayr li-sene mi’e ve elf. Şuhûdü’l-hâl: Hüseyin Efendi [b.] Mustafa, Gazzaz? Mehmed Efendi, el-Hâc Süleyman, İbrahim Çelebi, Ramazan Beşe, Ali b. İsa, Abdülkerim b. Osman, Hasan Beşe b. Abdullah, Mehmed Çelebi b. Mustafa.