İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 167 Hüküm no: 176 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da öldürülen Ali Çavuş b. Mustafa’nın varislerinin hizmetkarı İsmail Çelebi b. Mahmud’daki alacağını almaları Mihaliç kazâsında Runguş Paşa mahallesi sükkânından olup bundan akdem mahmiye-i İstanbul’da maktûlen vefât eden Ali Çavuş b. Mustafa’nın li-ebeveyn karındaşı kızı ve vârisesi Rahime bt. Abdülkerim nâm hâtûnun zevci ve tarafından husûs-ı câ’i’z-zikre vekîl-i müsecceli olan Mehmed Çavuş b. Mustafa meclis-i şer‘-i şerîf-i enverde müteveffâ-yı mezbûrun hayâtında hizmetkârı olan işbu bâ‘isü’l-kitâb İsmail Çelebi b. Mahmud mahzarında ikrâr ve takrîr-i kelâm edip bundan akdem mezbûr İsmail’den sen müteveffâ-yı mezbûrun terekesinden on sekiz yaldız altını ahz u kabz eyledin deyü da‘vâ etdiğimde ol dahi cevâbında müteveffânın zimmetinde cihet-i karzdan kırk guruş hakkım olmağla ahz eyledim deyü ikrâr ve kendüye hakkından ziyâde geçen iki yaldız altını müvekkile-i mezbûreye redd ü teslîm ol dahi ahz u kabz etdiğinden sonra müteveffâ-yı mezbûrun kalîl ve kesîr ve sâir nukūd ism-i mâl ıtlâk olunur terekesine müte‘allika âmme-i da‘vâdan mezbûr İsmail’in zimmetini ibrâ-i âmla ibrâ ve ıskāt eyledi, mezbûr biri birimiz ile vechen mine’l-vücûh ve sebeben mine’l-esbâb da‘vâ ve nizâ‘ımız ve hak ve müstahakkım kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fil-yevmi’l-hâmis min-Saferi’l-hayr li-sene mi’e ve elf. Şuhûdü’l-hâl: Mehmed Çelebi b. Hasan, Ali Bey b. Mehmed, İbrahim Çelebi b. Ahmed, Ali b. Bâli.