İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 167 Hüküm no: 177 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal taifesinden Kiryazi v. Yorgi’nin Yani v. Todori’deki alacağını kefalete bağlayarak tecil etmesi [Not: Kayıt yarısından itibaren 36b’den devam etmektedir.] Bakkal tâifesinden olup mahmiye-i İstanbul’da Aksaray Çarşısı’nda sâkin Kiryazi v. Yorgi nâm zimmî meclis-i şer‘-i şerîf-i enverde tâife-i mezbûreden olup mahmiye-i mezbûrede Tahtakale sûkunda sâkin Yani v. Todori nâm zimmî muvâcehesinde ikrâr ve takrîr-i kelâm edip yedimde olan işbu hüccet-i şer‘iyye nâtık olduğu üzere mezbûr Yani zimmetinde yedimden istidâne ve kabz eylediği nukūddan ve iştirâ eylediği bakkal metâ‘ı bahâsından ikrârı mertebesi otuz bin akçe hakkım olup hâlâ mezbûr Yani meblağ-ı mezbûrun on beş bin akçesini bana edâ ve teslîm, ben dahi yedinden ahz u kabz edip bâkī on beş bin akçesini hâlâ edâya iktidârı olmamağla te’cîle tâlib olmağın ben dahi meblağ-ı bâkī-i mezbûru târih-i kitâbdan yüz yirmi bir gün tamâmına değin te’cîl ve imhâl eylediğimde ol dahi te’cîl-i mezbûru kabûl ve meblağ-ı bâkī-i mezbûr on beş bin akçeyi va‘de-i mezbûre [36b] hulûlünde bana edâ ve teslîme ta‘ahhüd ve iltizâm eyledi dedikde gıbbe’t-tasdîki’ş-şer‘î tâife-i mezbûreden Dimitri v. Todori ve Astaryanos v. Şirotandifilo v. İstematı ve Anakosta v. Mihail ve Ranne v. Salo nâm zimmîler meblağ-ı bâkī-i mezbûr on beş bin akçeye ve her biri âharın zimmetine lâzım gelen mebâliğa tarafeynden emr ve kabûlü hâviye kefâlet-i sahîha-i şer‘iyye ile kefîl olmağın mâ-vaka‘a bi’t-taleb ve’l-istîfâ ketb u imlâ olundu. Fi’l-yevmi’s-sânî min-Saferi’l-hayr li-sene mi’e ve elf. Şuhûdü’l-hâl: Veli Beşe b. Ahmed, Abdülkadir Çelebi, Osman el-Mübâşir, Receb Beşe b. ( ) Bölükbaşı, Yani v. Dimo, Todori v. Mihail, Dimo v. Dorra