İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 168 Hüküm no: 178 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Ahmed’in Cafer Subaşı mahallesindeki evini Naime bt. İsmail’e satması Mahmiye-i İstanbul’da Cafer Subaşı mahallesinde sâkine Emetullah bt. Ahmed nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde işbu bâ‘isü’l-kitâb Naime bt. İsmail nâm hatun mahzarında ikrâr-ı tâm ve takrîr-i kelâm edip yedimde mülküm olup mahalle-i mezbûrede vâki‘ bir tarafdan Turşucu İbrahim menzili ve bir tarafdan Sepetçi Halil menzili ve bir tarafdan âhar mülküm olan arsa-i hâliye ve bir tarafdan tarîk-i âmla mahdûd fevkānî iki bâb oda ve bir sofa ve tahtlarında ahır ve mahtabı müştemil mülk menzilimi bi-cümleti’t-tevâbi‘ ve’l-levâhık ve kaffetü’l-hukūk ve’l-merâfık mezbûre Naime Hâtûn’a bey‘-i kat‘î ile yüz on guruşa bey‘ ve teslîm, ol dahi iştirâ ve tesellüm ve kabûl etdiğinden sonra semeni olan meblağ-ı mezbûr yüz on guruşu yedinden tamâmen ahz u kabz eyledim, ba‘de’l-yevm menzil-i mahdûd-ı mezkûr müşteriye-i merkūme Naime Hâtûn’un mülk-i müşterâsı olmuşdur, benim alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışîn min-Muharremi’l-harâm li-sene mi’e ve elf. Şuhûdü’l-hâl: Yazıcı Ali, Halil b. Ahmed, Halil Çelebi b. Mehmed, Mustafa b. Mehmed, İbrahim Beşe b. ( ), Ahmed Çelebi b. Ali, İbrahim Çelebi b. Ahmed.