İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 169 Hüküm no: 179 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Ali’nin Dülgerzâde mahallesindeki evinin yarısını hanımı Fatma bt. Yusuf’a satması Mahmiye-i İstanbul’da Dülgerzâde mahallesinde sâkin Ali Çelebi b. Ali meclis-i şer‘-i şerîf-i enverde işbu bâ‘isü’l-kitâb zevcesi Fâtıma bt. Yusuf nâm hatun mahzarında bi’t-tav‘i’s-sâf ikrâr-ı tâm ve takrîr-i kelâm edip silk-i mülkümde münselik olan mahalle-i mezbûrede vâki‘ bir tarafı Bostancıbaşı menzili ve bir tarafı Çorbacı menzili ve bir tarafı haffâfhâne ve bir tarafı tarîk-i âm ile mahdûd mülk menzilimden fevkānî ve tahtânî iki oda ve bir kilâr ve su kuyusu ve bahçenin dahi nısflarını ifrâz ve imtiyâz-ı tâm ile mümtâz ve zevcem mezbûre Fâtıma’ya kırk bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr kırk bin akçeyi yedinden alıp kabz edip mebî‘-i mahdûd-ı mezbûr bi-cümleti’l-hudûd ve’l-hukūk mezbûre Fâtıma’nın mülk-i müşterâsıdır, keyfe mâ teşâ’ mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Mustafa Çelebi, Serrâçbaşı Ahmed Efendi, Serrâçbaşı Süleyman Çelebi, Yusuf b. Abdullah, Hüseyin b. Şaban, İbrahim Çelebi b. Ahmed, İmâm Mehmed Efendi, Şeyh İsa Efendi.