İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 169 Hüküm no: 180 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayyat Muslihiddin Muallimhanesi muallim ve halifeliği mutasarrıfları Ahmed ve Mehmed b. Mahmud’un çocuk olmaları dolayısıyla görevin Yusuf Efendi b. Abdullah tarafından yerine getirilmesi Mahmiye-i İstanbul’da Cafer Ağa mahalesinde vâki‘ merhûm Hayyât Muslihiddin nâm sâhibü’l-hayrın binâ eylediği mu‘allimhânesinin berât-ı pâdişâhî ile mu‘allim olan Ahmed ve halîfesi olan Mehmed b. Mahmud nâm sagīrlerin vâlideleri ve kıbel-i şer‘den mansûbe vasîleri olan Emine bt. Mehmed nâm hatun meclis-i şer‘-i şerîf-i enver ve mahfil-i dîn-i münîf-i ezherde bâ‘is-i hâze’l-kitâb Yusuf Efendi b. Abdullah nâm kimesne mahzarında bi’l-vesâye ikrâr ve takrîr-i kelâm edip mezbûrân Ahmed ve Mehmed sagīr olmağla mutasarrıf oldukları mu‘allim ve halîfelik umûrunu görmeğe iktidârları olmamağla kudret-i hâllerine değin vesâyetim hasebiyle yevmî üçer akçe vazîfe ile mu‘allim ve halîfelik umûrunu görmeğe tarafımdan mezbûr Yusuf Efendi’yi vekîl ve nâib-i menâb nasb u ta‘yîn eyledim dedikde mezbûr Yusuf Efendi [38a] dahi vekâlet-i mezbûreyi kabûl ve hizmet-i lâzımesini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâdis min-Saferi’l-hayr li-sene mi’e ve elf. Şuhûdü’l-hâl: Abdullah Çelebi b. Ali, Abdurrahman Efendi, İbrahim Çelebi b. ( ), el-Hâc Abdi b. Mahmud.