İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 170 Hüküm no: 181 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Mehmed Ağa b. Hüseyin’in oturduğu evdeki tüm eşyaların hanımı Fatma bt. Şaban’a ait olduğunu beyan etmesi Mahmiye-i İstanbul’da Kesmekaya mahallesinde sâkin el-Hâc Mehmed Ağa b. Hüseyin meclis-i şer‘-i şerîf-i enverde zevcesi işbu bâ‘isü’l-kitâb Fâtıma bt. Şaban nâm hatun mahzarında ikrâr-ı tâm ve takrîr-i kelâm edip ben zevcem mezbûre Fâtıma Hâtûnla ma‘an vâlidesi Ümmühânî Hâtûn’un mahalle-i mezbûrede vâki‘ mülk menzilinde sâkinler olup hâlâ mezbûr menzil-i mezbûrda mevcûd evânî-i nühâsiyye ve gayr-ı nühâsiyye ve sâir huliy ve melbûsât ve mefrûşât cümlesi zevcem mezbûre Fâtıma Hâtûn’un mülkü ve hakkı olup ben hâlâ üzerimde işbu libâsımdan gayrı ism-i mâl ıtlâk olunur şeyim yokdur ve bir şeye mâlik değilim ve bi’l-cümle işbu libâsımdan mâ‘adâya alâka ve medhalim yokdur dedikde gıbbe’t-tasdîki’l-vicâhî mâ-hüve’l-vâkı‘ bi’t-taleb ve’l-istîfâ ketb u imlâ olundu. Fi’l-yevmi’s-sâdis min-Saferi’l-hayri’l-mübârek li-sene mi’e ve elf. Şuhûdü’l-hâl: Sahhâf Seyyid Mehmed Çelebi b. Seyyid Cafer, İbrahim Çelebi b. Hüseyin, Ahmed Efendi b. Mustafa, Ebûbekir b. Hüseyin ve gayruhüm.