İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 174 Hüküm no: 188 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi b. Mustafa’nın Dergah-ı Âlî yeniçerilerine mahsus nükud vakfına olan borcuna karşılık Gemlik’teki bağlarını rehin vermesi Mahmiye-i İstanbul’da Hoca Paşa mahallesinde sâkin İsmail Çelebi b. Mustafa nâm kimesne meclis-i şer‘-i şerîf-i enverde Dergâh-ı âlî yeniçerilerinin altmış dokuzuncu cemâ‘atine mahsûs oda meremmâtı için mevkūf nukūda hâlâ mütevellî olan işbu bâ‘isü’l-kitâb el-Hâc Sefer b. Ömer nâm kimesne mahzarında ikrâr ve takrîr-i kelâm edip mütevellî-i mezbûr el-Hâc Sefer yedinde olan hüccet-i şer‘iyye nâtık olduğu üzere zimmetimde mâl-ı vakf-ı mezbûra bi-hükmi’l-kefâle altı yüz kırk altı esedî guruş deynim olmağla mukābelesinde yedimde mülküm olup vilâyet-i Anadolu’da Gemlik kazâsına tâbi‘ Engürücük nâm karyede vâki‘ lede’l-ahâlî ve’l-cîrân ma‘lûmü’l-hudûd Lebulak bâğı demekle ma‘rûf bir kıt‘a bağ ve Kara Yusuf bâğı demekle ma‘rûf bir kıt‘a bağ ve Abdicik bâğı demekle ma‘rûf bir kıt‘a bağ ve Yakuboğlu bâğı demekle ma‘rûf bir kıt‘a bağ ve Kapıcı bâğı demekle ma‘rûf bir kıt‘a bağ ve Köyüstü bâğı demekle ma‘rûf bir kıt‘a bağ ki cem‘an altı kıt‘a bâğımı fâriğan ani’ş-şevâgil mütevellî-i mezbûra bundan akdem mahallinde rehn vaz‘ ve teslîm ol dahi irtihâb ve tesellüm eyledi, hâlâ asl-ı mâl-ı vakf-ı mezbûr altı yüz kırk altı guruş ve târih-i kitâb senesi Muharremü’l-harâm’ının onuncu gününden bir sene tamâmına değin müeccel [ve] mev‘ûd vakf-ı mezbûrun çukası bahâsından dahi doksan yedi guruş ki cem‘an yedi yüz kırk üç guruş vakf-ı mezbûra zimmetimde deynim vardır dedikde gıbbe’t-tasdîki’ş-şer‘î zâtları ma‘rifet-i şer‘iyye ile ârifân el-Hâc Süleyman b. Salih ve Hasan b. Hacı nâm kimesneler ta‘rîfleriyle mu‘arrefe olan mukırr-ı mezbûrun vâlidesi Kısmeti bt. Ali ve zevcesi Fâtıma bt. Abdullah nâm hatunlardan her biri asl-ı mâl-ı mezbûr ile çuka bahâsından olan meblağ-ı mezbûra tarafeynden emr ve kabûlü hâviye kefâlet-i sahîha-i şer‘iyye ile kefîl olduk dediklerinde mâ-vaka‘a bi’t-taleb ketb olundu. Fi’l-yevmi’l-âşir min-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, el-Hâc Mustafa b. Tevekkül, Ali Çelebi b. Bâli, el-Hâc Mehmed b. Mehmed, el-Hâc Ali b. Mehmed, Attâr Ömer Çelebi b. Mustafa ve Ali Çelebi b. Mehmed, Mehmed Çelebi b. İbrahim ve gayruhüm.