İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 175 Hüküm no: 189 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selim Ağa b. Osman’ın eski hanımı Ayşe bt. Mustafa Paşa’ya ait olup haksız yere yıktığı çiftliği yeniden yapmayı taahhüd etmesi Mahrûse-i Üsküdar’da sâkin fahru’l-akrân Selim Ağa b. Osman nâm kimesne meclis-i şer‘-i şerîf-i enverde bâ‘is-i hâze’l-kitâb el-Hâc Yusuf Çavuş b. Hüseyin mahzarında ikrâr ve takrîr-i kelâm edip sâbıkā zevcem olan işbu Âişe bt. Mustafa Paşa’nın Silivri kurbünde vâki‘ ma‘lûmü’l-hudûd çiftliğini ben bi-gayrı hakkın hedm ve kurbünde vâki‘ benim çiftliğime nakl etmemle eğer mârru’z-zikr çiftliği târih-i kitâbdan yedi seneye değin vaz‘-ı kadîm üzere binâ ve içinde olan eşyâsını teslîm etmez isem sâlifü’z-zikr çiftliğimi semen-i misli ile âhara bey‘a ve semeninden mezkûre hânımın zikr olunan çiftliğini kemâkân binâya ve fazla kalırsa bana îsâle tarafımdan merkūm el-Hâc Yusuf Çavuş’u küllemâ azeltüke fe-ente vekîli mazmûnu üzere azl ve in‘izâlden masûne vekâlet-i devriye ile vekîl eyledim dedikde ol dahi vekâlet-i mezbûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî evâsıtı Zilka‘de li-sene mi’e ve elf. Şuhûdü’l-hâl: el-Hâc Receb Efendi tâbi‘-i efendi, İbrahim Efendi el-Kâtib, İbrahim Ağa kethudâ-yı efendi, Ahmed Ağa Hazînedâr.