İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 175 Hüküm no: 190 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. el-Hac Mehmed’in mehir ve nafakasını alarak Ali b. Osman’dan boşanması Mahmiye-i İstanbul’da Âşık Paşa mahallesi sâkinelerinden olup zâtı ma‘rifet-i şer‘iyye ile ârifân mahalle-i mezbûre sükkânından Mehmed Efendi b. Ahmed ve Bayram Efendi b. Mehmed nâm kimesneler ta‘rîfleriyle mu‘arrefe olan Emine bt. el-Hâc Mehmed nâm hatun meclis-i şer‘-i şerîf-i enver ve mahfil-i dîn-i münîf-i ezherde zevc-i dâhili bâ‘is-i hâze’l-kitâb Ali b. Osman mahzarında ikrâr ve takrîr-i kelâm edip ber-vech-i mezbûr Ali zimmetinde mütekarrir ve ma‘kūdün-aleyh olan üç bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Ali ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra hukuk-ı zevciyyete müte‘allika âmme-i da‘vâdan herbirimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-âşir min-Muharremi’l-harâm li-sene mi’e ve elf. Şuhûdü’l-hâl: Mehmed Efendi b. Mehmed, Bayram Efendi b. Ahmed, el-Hâc Mustafa İmâm Efendi, Seyyid Ahmed Efendi.