İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 176 Hüküm no: 191 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar taifesinden İvaz b. İbrahim’in es-Seyyid Hasan Çelebi b. Hüseyin’den alacaklı olduğu iddiası Tüccâr tâifesinden olup mahmiye-i İstanbul’da Çukurhân’da sâkin İvaz b. İbrahim nâm kimesne meclis-i şer‘-i şerîf-i enver ve mahfil-i dîn-i münîf-i ezherde bâ‘is-i hâze’l-kitâb es-Seyyid Hasan Çelebi b. Hüseyin nâm kimesne mahzarında üzerine da‘vâ ve takrîr-i kelâm edip mezbûr es-Seyyid Hasan Çelebi zimmetinde târih-i kitâbdan dört sene mukaddem yedimden istidâne ve kabz eylediği levn ve zirâ‘ı beynimizde ma‘lûm bogasi ve ester bahâlarından otuz yedi guruş ve bir zolata hakkım olmağla taleb eylediğimde bana edâdan imtinâ‘ eder, hâlâ mezbûr es-Seyyid Hasan Çelebi’ye suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyin beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûrdan târih-i mezbûrda levni ve zirâ‘ı beynlerinde ma‘lûm bogasi ve ester iştirâ etmeyip ol vechile müdde‘î-i mezbûre üzerine edâsı lâzım otuz yedi guruş ve bir zolata deyni olmadığına mezbûr es-Seyyid Hasan Çelebi’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâmin min-Muharremi’l-harâm li-sene mi’e ve elf. Şuhûdü’l-hâl: es-Seyyid Mehmed Çelebi b. Mustafa, İbrahim Çelebi b. Ahmed, Hüseyin Çelebi b. Mehmed, Ali Çelebi b. Bâli, Mehmed Çelebi b. Receb.