İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 176 Hüküm no: 192 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Odabaşı Mustafa Beşe b. Ali Ağa’nın kızları Ümmügülsüm ve Ümmühani’nin, babalarının tasarrufundaki vakıf eve el koyan el-Hac Mehmed b. Ali ile sulh olmaları Mahmiye-i İstanbul’da Defterdâr Ahmed Çelebi mahallesinde sâkin iken bundan akdem vefât eden Odabaşı Mustafa Beşe b. Ali Ağa’nın sulbiye kebîre kızları olup zâtlarını ma‘rifet-i şer‘iyye ile ârifân İmâm Mehmed Efendi b. Mustafa ve Mustafa b. Ömer ta‘rîfleriyle mu‘arrefetân Ümmügülsüm ve Ümmühânî nâm hâtûnlar meclis-i şer‘-i şerîf-i enverde zikri âtî menzile vâzı‘u’l-yed olan işbu bâ‘isü’l-kitâb el-Hâc Mehmed b. Ali mahzarında her biri ikrâr-ı tâm ve takrîr-i kelâm edip mezbûr Defterdâr Ahmed Çelebi Vakfı’ndan olup mahalle-i mezbûrede vâki‘ bir tarafdan vakf-ı mezbûr ve bir tarafdan Solakbaşı merhûm vakfı ve bir tarafdan tarîk-i hâs ve bir tarafdan tarîk-i âmla mahdûd büyûtu müştemil vakıf menzil icâre-i mu‘accele ve ayda yirmi akçe icâre-i müeccele ile babam müteveffâ-yı merkūm Mustafa Beşe’nin taht-ı tasarrufunda olup ba‘dehû babamız merkūm Mustafa Beşe hâl-i hayâtında menzil-i mezbûru târih-i kitâbdan on üç sene mukaddem zevcesi olan işbu hâzıra bi’l-meclis vâlidemiz Afife bt. İvaz’a ma‘rifet-i mütevellî ile ferâgat edip ol dahi âhara ferâgat etmekle tedâvül edilen menzil-i mezbûr Kayyûmzâde Mehmed Efendi nâm kimesnenin kezâlik izn-i mütevellî taht-ı tasarrufuna girip ba‘dehû mezbûr Mehmed Efendi kezâlik menzil-i mezbûru işbu merkūm el-Hâc Mehmed’e izn-i mütevellî ile ferâğ ve tefvîz ol dahi tefevvüz ve kabûl etmişidi. …. babamız merkūm Mustafa Beşe maraz-ı mevtinde vâlidemize ferâgat eyledi deyü da‘vâ sadedinde olmağla beynimizde nizâ‘ vâki‘ olmağın el-hâletü hâzihî merkūm el-Hâc Mehmed kat‘en li’n-nizâ‘ bin altı yüz akçeyi bi-tarîki’ş-şer‘ bize def‘ ve teslîm, biz dahi yedinden ahz u kabz etdiğimizden sonra da‘vâ-yı mezbûreden herbirimiz fâriğa olup ba‘de’l-yevm menzil-i mezbûra müte‘allika âmme-i da‘vâdan merkūm el-Hâc Mehmed’in zimmetini ibrâ-i âmla ibrâ ve ıskāt eyledik, min ba‘d da‘vâ ve nizâ‘ımız kalmamışdır dediklerinde gıbbe’t-tasdîki’l-vicâhî mâ-hüve’l-vâkı‘ bi’t-taleb ketb olundu. Fi’l-yevmi’l-âşir min-Muharremi’l-harâm li-sene mi’e ve elf. Şuhûdü’l-hâl: Hacı Bektaş, Ali Ağa b. Hasan, Ramazan [b.] Musli Beşe, (…), el-Hâc Derviş b. Mehmed, el-Hâc Mustafa.