İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 177 Hüküm no: 193 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasper v. Bedros’un oğlu Avanis’in, Abraham v. Gaşşi’deki alacağının terekesinden tahsil edilmesi Mahmiye-i İstanbul’da Kâtib Kasım mahallesinde sâkin iken bundan akdem hâlik olan Kasper v. Bedros nâm zimmî sulbî sagīr oğlu Avanis’in vâlidesi ve taraf-ı şer‘den mansûbe vasîsi olan Kazer bt. Nevruz nâm nasrâniye ba‘de’t-ta‘rîfi’ş-şer‘î meclis-i şer‘-i şerîf-i enverde mahmiye-i mezbûrede Şeyh Ferhad mahallesinde sâkin iken kezâlik hâlik olan Abraham v. Gaşşi nâm zimmî sulbî sagīr oğulları Sahak ve Agop’un vasiyy-i mansûbları olan Arminya v. Bahadır nâm zimmî muvâcehesinde bi’l-vesâye ikrâr-ı tâm ve takrîr-i kelâm edip hâlik-i mezbûr Abraham hayâtında oğlum sagīr-i mezbûr Avanis’in vasiyy-i mansûbu olmağın babasından kendüye intikāl eden mâldan iki yüz yetmiş guruşu kabz ve kendü mesârifine sarfla istihlâk etdiğinden sonra zimmetinde iken hâlik olmağın bundan akdem ben meblağ-ı mezbûru terekesine vâzı‘u’l-yed olan işbu vasiyy-i merkūm Arminya’dan huzûr-ı hâkimde taleb ve da‘vâ ve şuhûd-ı udûlüyle isbât ve şer‘an edâsına hükm-i şer‘î dahi lâhık olup ve yedime işbu hükm-i hüccet dahi verilmişdi. Hâlâ merkūm Arminya meblağ-ı mezbûr iki yüz yetmiş guruşu bana edâ ve teslîm, ben dahi sagīr-i mezbûr için vesâyetim hasebiyle tamâmen ahz u kabz ve istîfâ eyledim, min ba‘d meblağ-ı mezbûr iki yüz yetmiş guruşdan vasiyy-i merkūm Arminya kıbelinde bir akçe ve bir habbe bâkī kalmamışdır dedikde gıbbe’t-tasdîki’l-vicâhî mâ-vaka‘a bi’t-taleb ve’l-istîfâ ketb u imlâ olundu. Fi’l-yevmi’s-sâbi‘ min-Muharremi’l-harâm li-sene mi’e ve elf. Şuhûdü’l-hâl: Mustafa Efendi el-İmâm, Bazarcı Süleyman, Berber Ahmed Çelebi b. ( ), Attâr el-Hâc Mehmed b. ( ), İbrahim Çelebi b. Ahmed, Ahmed b. Abdi.