İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 178 Hüküm no: 194 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergah-ı Âlî yeniçerilerine mahsus nükud vakfı mütevellisi Mehmed Çelebi b. Murad’ın vakfın eski mütevelli Halil Efendi b. Ali’deki vakıf paralarını teslim alması Dergâh-ı âlî -mahfûfen bi’l-me‘âlî- yeniçerilerinin on sekiz ağa bölüğüne mahsûs oda mühimmâtı için mevkūf nukūda hâlâ mütevellî olan Mehmed Çelebi b. Murad meclis-i şer‘-i şerîf-i enverde sâbıkā vakf-ı mezbûra mütevellî olan Halil Efendi b. Ali mahzarında ikrâr-ı tâm ve takrîr-i kelâm edip mezbûr Halil Efendi vakf-ı mezbûra bin doksan beş senesi Muharremü’l-harâm gurresinden bin yüz senesi Muharremü’l-harâm gurresine gelince mütevellî olup hâlâ mezbûr Halil Efendi azl ve yerine ben mütevellî olduğumda oda-i mezkûre ahâlîsinden olup zeyl-i kitâbda muharrerü’l-esâmî yoldaşlarımız ma‘rifetleriyle mezbûr Halil Efendi’nin muhâsebesini gördüğümüzde Halil Efendi yedinde mevcûd asl-ı mâl olan beş yüz on guruş ve nemâsından hâsıl olan meblağdan ba‘de ihrâci’l-mesârif bâkī kalan yüz elli bir buçuk guruş ki min haysü’l-mecmû‘ mezbûr Halil Efendi yedinde altı yüz altmış bir buçuk guruşu bana def‘ ve teslîm, ben dahi vakf-ı mezbûr için bi’t-tevliye yedinden kabz ve tesellüm eyledim, fîmâ-ba‘d mezbûr Halil Efendi yedinde ve zimmetinde asl-ı mâl ve murâbahadan bir akçe ve bir habbe bâkī kalmamışdır dedikde gıbbe’t-tasdîki’l-mu‘teberi’l-vicâhî mâ-hüve’l-vâkı‘ bi’t-taleb ketb olundu. Fi’l-yevmi’l-hâdis aşer min-Muharremi’l-harâm li-sene mi’e ve elf. Şuhûdü’l-hâl: Hüseyin Efendi el-Kâtib, Şatır Mehmed Ağa Çorbacı-yı sâbık, Hamza Beşe b. Ali, Bekir Odabaşı, Mahmud Beşe b. Mustafa, Silivrikapılı Mustafa, Mustafa b. Mehmed, Mehmed Odabaşı-yı sâbık, Solak İbrahim Beşe, Sefer Çelebi b. Bayram, Çelebi Mehmed Çelebi, Gümüşhaneli el-Hâc Hasan.