İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 178 Hüküm no: 195 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal iken kaybolan Yorgi v. Panayot’ın dükkanının açılarak eşyalarının satılması Mahmiye-i İstanbul’da Parmakkapı kurbünde bakkal iken gaybet-i münkatı‘a ile gāib olan Yorgi v. Panayot dükkânı mukaffel kalmağla açılıp içinde olan eşyâsı tahrîr ve dükkân-ı mezbûr sâhibine ba‘de’t-tahliye teslîm için fermân-ı âlî sâdır olmağla imtisâlen-leh cânib-i şer‘den dükkân-ı mezbûr feth ve içinde bulunan bakkal metâ‘ı ba‘de’t-tahrîr durmağla bi’l-külliye telef ve zâyi‘ olmağla âhara bey‘ olundukda semenleri bin altı yüz akçeye bâliğ olmağla bakkal tâifesi re’yleriyle bir kimesne kayyûm nasb u ta‘yîn ve meblağ bi’l-emâne teslîm olunmak lâzım ve işbu bâ‘isü’l-vesîka Salmatomruk’da bakkal olan Temili v. Yorgi mezbûr tarafından kayyûm nasb u ta‘yîn ve meblağ-ı mezbûr bi’l-emâne kendüye teslîm, ol dahi kabûl ve meblağ-ı mezbûru kabz etmeğin işbu vesîka bi’t-taleb ketb olundu. Fî gurreti Muharremi’l-harâm sene mi’e ve elf. Şuhûdü’l-hâl: Veli Beşe b. Nazari, Hüseyin Bölükbaşı, Sefer Beşe, Hasan Beşe Serbölük, Panayot v. Hıristo, Yani v. Kanil, Manol v. Dimo.