İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 180 Hüküm no: 197 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap taifesinden Mehmed Beşe b. Dursun’un Sakızlı Musa b. Mustafa’da olan alacağını taksite bağlaması Kasâb tâifesinden olup mahmiye-i İstanbul’da Arabacı Bayezid mahallesinde sâkin Mehmed Beşe b. Dursun meclis-i şer‘-i şerîf-i enverde tâife-i mezbûreden işbu bâ‘isü’l-kitâb Sakızlı Musa b. Mustafa mahzarında ikrâr-ı tâm ve takrîr-i kelâm edip merkūm Musa zimmetinde yedimden iştirâ ve kabz eylediği beynimizde ma‘lûm koyun bahâsından yetmiş yedi bin yetmiş akçe hakkım olup bundan akdem meblağ-ı mezbûru mezbûr Musa’dan taleb ve da‘vâ ve ba‘de’l-hükm dört ay mikdârı mezbûr Musa’yı habs etdirip ba‘dehû beynimizde muslihûn [tavassut] edip mezbûr Musa benimle üç yüz guruş üzerine sulh oldukda ben dahi sulh-ı mezbûru kabûl edip lâkin mezbûr Musa bedel-i sulh-ı mezbûru hâlâ edâya iktidârı olmayıp taksît ve te’cîle tâlib oldukda ben dahi bedel-i sulh olan meblağ-ı mezbûr üç yüz guruşun yirmi beş guruşunu hâlâ alıp ve bâkī iki yüz yetmiş beş guruşu beher sene tamâmında yirmi beş guruş olmak üzere târih-i kitâbdan on bir sene tamâmına değin te’cîl ve taksît eylediğimde mezbûr Musa dahi taksît-i mezbûru kabûl ve meblağ-ı mezbûr üç yüz guruşu ber-vech-i meşrûh bana edâ ve teslîme ta‘ahhüd ve iltizâm eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ [min] Muharremi’l-harâm li-sene mi’e ve elf. Şuhûdü’l-hâl: Süleyman b. Mehmed, Attâr İbrahim Beşe b. Mahmud, İbrahim Çelebi b. Ahmed, Mehmed Çelebi b. Ahmed, Ebûbekir b. Hüseyin.