İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 180 Hüküm no: 198 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ali’nin, kendisini döverek çocuk düşürmesine ve küçük oğlu Hüseyin’in üzerine basarak ölümüne sebep olanlarla sulh olması Mahmiye-i İstanbul’da Karabaş mahallesi sükkânından Hasan b. Sadullah tarafından husûs-ı âti’z-zikri ikrâra vekîl olduğu Yusuf Çelebi b. Mustafa ve Musa b. Osman şehâdetleriyle şer‘an sâbit olan el-Hâc Yusuf b. Mehmed nâm kimesne vekâleten ve müvekkil-i mezbûr zevcesi olup verâseti ma‘rifet-i şer‘iyye ile ârifân mezbûrân Yusuf Çelebi ve Mustafa ta‘rîfleriyle mu‘arrefe olan Emine bt. Ali nâm hatun asâleten meclis-i şer‘-i şerîf-i enverde kendi tarafından asâleten ve vâlidesi Saliha bt. Abdullah ve kız karındaşı Hadice bt. Ahmed tarafından husûs-ı âti’z-zikre sâbitü’l-vekâle vekîl olan Saime nâm hatun mahzarında her biri ikrâr ve takrîr-i kelâm edip mezbûre Emine târih-i kitâbdan üç ay mukaddem mezbûrât Saliha ve Hadice ve Saime beni bi-gayrı hakkın darb-ı şedîd ile darb eylediklerinde ondan nâşî müstebînü’l-hilka bir cenîn-i meyyit ilkā edip ve esnâ-i darbda zevcim mezbûrun firâşından hâsıl ve benden mütevellid Hüseyin nâm sagīr oğlumu dahi ayakları ile basıp ol dahi ondan nâşî fevt olmuşdur deyü mûceb-i şer‘îlerini mezbûrâtdan herbirinden taleb ve da‘vâ eylediğimde onlar dahi inkâr etmeleriyle beynimizde münâza‘ât-ı kesîre cereyân etmişdi. El-hâletü hâzihî beynimize muslihûn tavassut edip da‘vâ-yı mezbûremizden merkūmât ile bizi on üç guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr on üç guruşu yedlerinden tamâmen ahz u kabz edip husûs-ı mezbûra ve sâireye müte‘allika âmme-i da‘vâdan mezbûrâtın zimmetlerini ibrâ-i âm ile ibrâ ve ıskāt eyledik dediklerinde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâdi aşer mine’l-Muharremi’l-harâm li-sene mi’e ve elf. Şuhûdü’l-hâl: Mustafa Çelebi b. Mustafa, Mehmed Çelebi b. Hüseyin, Ali Beşe b. Kalender, Mehmed Çavuş b. Receb, İbrahim Çelebi b. Ahmed, Ebûbekir b. Hüseyin.