İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 181 Hüküm no: 199 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı taifesinden Vasil v. Duka, Karazko v. İstoyko ve Yorgo v. Duka’nın yanında çalıştıkları Dimo v. Velon ile ortaklıklarının reddedildiği Mahmiye-i İstanbul’da Langa’da sâkin bostancı tâifesinden Vasil v. Duka ve Karazko v. İstoyko ve Yorgo v. Duka nâm zimmîler meclis-i şer‘-i şerîf-i enverde yine tâife-i mezbûreden işbu bâ‘isü’l-vesîka Dimo v. Velon nâm zimmî muvâcehesinde üzerine da‘vâ ve takrîr-i kelâm edip târih-i kitâbdan bir sene mukaddem mezbûr Dimo bostancılıkda herbirimizi bir sene gāyetine değin ikişer bin akçe ücret ile istîcâr, biz dahi nesfimizi ba‘de’l-îcâr altı ay mürûr etdikde kable’l-fesh bostandan hâsıla mahsûlâtın fâidesine bizi şerîk edip sene-i mezbûre tamâm oldukda ücretlerimiz ikişer bin akçeyi bize teslîm, biz dahi tamâmen ahz u kabz edip şirket-i mezkûre kavlimize binâen hâsıla olan mahsûlâtdan fâide taleb eylediğimizde teslîmden imtinâ‘ eder, suâl olunup hisselerimiz teslîme tenbîh olunmak matlûbumuzdur dedikde mezkûrûnun iddi‘âları üzere kable feshi’l-icâre şirket meşrû‘a olmamağla mezbûrûnun iddi‘âları lağv-ı mahz olmağla mezbûra suâl dahi teveccüh etmeyip şirkete müte‘allika bî-vech mu‘ârazadan mezbûrûn men‘ olunup mâ-vaka‘a bi’t-taleb ketb olundu. Fî gurreti’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Ali b. Bâli, Mehmed b. Ahmed.