İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 182 Hüküm no: 200 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirci taifesinden Todori v. Ağya’nın Divriği kazası Kesme köyündeki tarlasının tasarruf hakkını Mardoros ve Delek v. Kirakoz’a satması Demirci tâifesinden To[dori] v. Ağya nâm zimmî meclis-i şer‘[‘-i] şerîfde ve mahfil-i dîn-i münîf-i ez[herde] yine tâife-i mezbûreden bâ‘isü hâze’s-sifr Mardoros ve Delek v. Kirakoz nâm zimmîler muvâcehesinde ikrâr ve tak[rîr-i kelâm] edip tefvîz-i câ’i’z-zikr sudûruna değin taht-ı tasarrufumda olup vilâ[yet-i] Anadolu’da Divriği kazâsına tâbi‘ Kesme nâm karye sınırı dâhilinde vâki‘ bir taraf[dan] Panos tarlası ve bir tarafdan Ariton tarlası ve bir tarafdan Haçik tarlası ve bir tarafdan hark ile mahdûd bir kıt‘a tarlamın hakk-ı tasarrufunu sâhib-i arz ma‘rifetiyle mezbûrân Mardoros ve Delek nâm zimmîlere on se[kiz] guruş bedel mukābelesinde ferâğ ve tefvîz onlar dahi ale’l-iştirâki’s-seviy tefevvüz ve kabûl eylediklerinden sonra bedel-i ferâğ olan meblağ-ı mezbûr on sekiz guruşu mezbûrân Mardoros ve Delek yedlerinden tamâmen ahz u kabz eyledim, ba‘de’l-yevm mârru’z-zikr tarlamı mahallinde zabt u tasarrufa mezbûrân Mardoros ve Delek’i taslît eyledim, keyfe mâ yeşâ’ân ve yahtârân mutasarrıf olsunlar dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Siyavuş Bey b. Abdullah, Ali Çelebi b. Bâli, Ebûbekir b. Hüseyin, Mehmed b. İbrahim, Begos v. Sahak, Penker v. Mıgırdıç, Vartan v. Toros.