İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 183 Hüküm no: 202 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac İbrahim b. Osman’ın kölesi İvaz b. Abdullah’ı mükâtebe yoluyla azat etmesi Mahmiye-i İstanbul’da Ali Paşa-yı Atîk mahallesinde sâkin işbu râfi‘ü’l-kitâb el-Hâc İbrahim b. Osman meclis-i şer‘-i şerîf-i enverde işbu orta boylu, sarı açık kaşlı, elâ gözlü Rusiyyü’l-asl İvaz b. Abdullah nâm abd-i memlûkü muvâcehesinde ikrâr ve takrîr-i kelâm edip mevsûf-ı mezbûr İvaz târih-i kitâbdan altı sene tamâmına değin istikāmet üzere bana hizmet edip ba‘dehû âzâd olmak üzere kitâbete kat‘ eyledim dedikde ol dahi kitâbet-i mezbûreyi kabûl ve müddet-i mezbûre tamâmına değin istikāmet üzere hizmet etmek üzere ta‘ahhüd ve tasdîk etmeğin mâ-vaka‘a bi’t-taleb ketb olundu. Fi’l-yevmi’r-râbi‘ aşer mine’l-Muharremi’l-harâm li-sene mi’e ve elf. Şuhûdü’l-hâl: Hâfız Süleyman Efendi b. Cafer, es-Seyyid Himmet Çelebi b. Şükrullah, Abdullah Çelebi b. Mehmed, Hüseyin Çelebi b. İbrahim, es-Seyyid Ahmed Çelebi b. Receb, Hasan Çelebi b. Abdullah, Mehmed Çelebi b. İsmail, Serrâç İbrahim b. Mehmed.