İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 183 Hüküm no: 203 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Ali Ağa b. Kasım Çorbacı b. Mehmed’in kaçan ve Esirci Mehmed Beşe b. İsmail’in elinde bulunan kölesi Ahmed b. Abdullah’ı geri alması Sâbıkā kasaba-i İsakçı’da Dergâh-ı âlî yeniçerileri ağası olup hâlâ medîne-i Edirne’de sâkin Haseki Ali Ağa b. Kasım Çorbacı b. Mehmed tarafından husûs-ı âti’z-zikre vekîl olduğu hasm-ı şer‘î-i câhid mahzarında Ahmed Beşe b. Osman ve el-Hâc Hüseyin Beşe b. Abdullah şehâdetleriyle şer‘an sâbit sübût-ı vekâletine hükm-i şer‘î lâhık olan Süleyman Beşe b. Abdülkerim nâm kimesne meclis-i şer‘-i şerîf-i enverde Esirci tâifesinden Mehmed Beşe b. İsmail mahzarında bi’l-vekâle üzerine da‘vâ ve takrîr-i kelâm edip işbu müşâhed olunan açık kaşlı, elâ gözlü, orta boylu Rusiyyü’l-asl Ahmed b. Abdullah müvekkilim mezbûr Haseki Ali Ağa’nın müteveffâ Hüseyin Beşe nâm kimesnenin veresesinden semen-i ma‘lûme ve medfû‘a iştirâ eylediği abd-i memlûku olup bin doksan dokuz senesi şehr-i Ramazânü’l-mübârekin yirminci günü mezbûr Ahmed kasaba-i İsakçı’da müvekkilim mezbûrun yedinde ibâk etmişdi. Hâlâ mezbûr Mehmed Beşe yedinde buldum <> suâl olunup alıverilmesi matlûbumdur dedikde gıbbe’s-suâl Mehmed Beşe cevâbında mevsûf-ı mezbûr Ahmed’i sene-i mezbûre Zilka‘desi evâhirinda Çukurbostan kurbünde sâkin Odabaşıoğlu Mehmed Çelebi nâm kimesneden yüz on sekiz guruş semen-i medfû‘a iştirâ etmişdim deyü vaz‘-ı yedini ikrâr lâkin müvekkil-i mezbûrun ber-vech-i muharrer abd-i memlûku olup mülkünde ibâk eylediğini inkâr edicek, vekîl-i mezbûrdan müdde‘âsını mübeyyine beyyine taleb olundukda udûl-ı müslimînden mezbûrân Ahmed Beşe ve el-Hâc Hasan Beşe ile [42b] el-Hâc Osman b. Ali ve Mustafa Beşe b. Ahmed nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka işbu mevsûf-ı mezbûr Ahmed müvekkil-i merkūm Haseki Ali Ağa b. Kasım Çorbacı b. Mehmed’in müteveffâ-yı mezbûr Hüseyin Beşe’nin veresesinden semen-i ma‘lûm ve medfû‘a iştirâ eylediği abd-i memlûkudur, mezbûr Ahmed sene-i mezbûre şehr-i Ramazânü’l-mübârekinin yirminci günü kasaba-i İsakçı’da müvekkili mezbûrun yedinden ibâk etmişdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mevkūfen alâ yemîn-i müvekkili’l-mezbûr mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâmis aşer mine’l-Muharremi’l-harâm li-sene mi’e ve elf. Şuhûdü’l-hâl: Ahmed Beşe b. Mustafa, Kollukçu Mehmed Beşe b. Ali, İbrahim Çelebi b. Ahmed, Siyavuş Bey b. Abdullah.