İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 184 Hüküm no: 204 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saatçi Toma v. İstefan’ın Angeline bt. Yani’ye karşı olan davasından vazgeçmesi Mahmiye-i İstanbul’da Fenerkapısı kurbünde sâkin Saatçi Toma v. İstefan nâm zimmî meclis-i şer‘-i şerîf-i enverde işbu bâ‘isetü’l-vesîka Angeline bt. Yani nâm nasrâniye muvâcehesinde ikrâr ve takrîr-i kelâm edip bundan akdem mezbûre Angeline’den, sâbıkā damadın olup hâlâ Selanik’de sâkin Saatçi Hıristodolo v. Panayot senin yedinde olan sagīr oğlu Kostantin’i senden alıp kendüye götürmeğe tarafından beni vekîl nasb u ta‘yîn etmişidi deyü sagīr-i mezbûru taleb ve da‘vâ sadedinde olmuşdum, hâlâ da‘vâ-yı mezkûreden fâriğ ve vekâlet-i mezbûreden kendimi azl edip min ba‘d mezbûre Angeline ile bir vechile da‘vâ ve nizâ‘ım yokdur dedikde gıbbe’t-tasdîki’l-mu‘teberi’l-vicâhî mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene mi’e ve elf. Şuhûdü’l-hâl: Mehmed Çavuş b. ( ) el-Mübâşir, İbrahim Çelebi b. Ahmed, Hüseyin Çelebi, Ebûbekir b. Hüseyin ve gayruhüm.