İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 185 Hüküm no: 205 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülistan bt. Abdurrahman’nın el-Hac Ali Ağa b. Mehmed’den alacaklı olduğu iddiası Mahmiye-i İstanbul’da Küçük Ayasofya mahallesinde sâkine Gülistan bt. Abdurrahman nâm hatun meclis-i şerî‘at-ı şerîfe-i garrâda bâ‘is-i hâze’l-kitâb el-Hâc Ali Ağa b. Mehmed nâm kimesne mahzarında üzerine da‘vâ ve takrîr-i kelâm edip mezbûr el-Hâc Ali Ağa’ya takrîben dört sene mukaddem menzilinde yedi yüz seksen guruşumu ikrâz ve teslîm, ol dahi iktirâz ve kabz ve tesellüm edip hatta ikrâr dahi etmekle suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve’l-inkâr müdde‘iye-i mezbûrdan müdde‘âsını mübeyyin beyyine taleb olundukda beyyine-i âdilesi olmayıp ityân-ı beyyineden izhâr-ı acz edip yemîn dahi vermemekle mûcebiyle bilâ-beyyine-i âdile bî-vech mu‘ârazadan men‘ olunup mâ-vaka‘a bi’t-taleb ketb olundu. Fî evâsıtı Muharremi’l-harâm li-sene mi’e ve elf. Şuhûdü’l-hâl: Mehmed Efendi b. Mehmed, İbrahim Ağa b. ( ), Ahmed Ağa Hazînedâr, el-Hâc Süleyman Çukadâr, el-Hâc Mehmed b. Hasan, Kürkçü Ali b. Ahmed, el-Hâc Ahmed b. Abdi, Fırıncı el-Hâc Ahmed, el-Hâc Mehmed b. Mahmud, Ömer Ağa.