İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 185 Hüküm no: 206 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aslen Mora sancağından olan Ayşe bt. Seydi b. Ali’nin vasiyyeti ve dayısıoğlu Kasım Çelebi b. Abdülhalim’i vasi tayin etmesi Husûs-ı âti’z-zikrin mahallinde ketb u tahrîri için savb-ı şer‘den bi’t-taleb irsâl olunan Mevlânâ Ebûbekir Efendi b. el-Hâc Abdülkerim fi’l-asl Mora sancağında Kartine kazâsına tâbi‘ Akava nâm karye sâkinelerinden Âişe bt. Seydî b. Ali nâm hâtûnun hâlâ mahmiye-i İstanbul’da Unkapanı kapısı dâhilinde Azebler mahallesinde müsâfereten sâkine olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde zâtı ma‘rifet-i şer‘iyye ile ârifân Hüseyin Beşe b. Ali ve Hasan Çelebi b. Mehmed ta‘rîfleriyle mu‘arrefe olan mezbûre Âişe Hatun meclis-i ma‘kūd-ı mezbûrda dayısıoğlu râfi‘u hâze’l-kitâb Kasım Çelebi b. Abdülhalim mahzarında ikrâr ve takrîr-i kelâm edip hâlâ ben hasta ve sâhibetü’l-firâş olmağın bi-emri’llâhi te‘âlâ fevt olduğumda mezbûr Kasım Çelebi cemî‘ terekemi kabz ve terekemin sülüsünü techîz ve tekfîn ve ıskāt-ı salât ve sâir mesârif-ı defnime harc u sarf edip ve sülüsânı li-ebeveyn ammim ve hasren vârisim olan Mehmed Ağa nâm kimesneye teslîm eyleye deyü vasiyyet ve bu vasiyyetimi tenfîze mezbûr Kasım Çelebi’yi vasiyy-i muhtâr nasb u ta‘yîn eyledim dedikde ol dahi vesâyet-i mezbûreyi kabûl ve merâsimini edâya ta‘ahhüd etmeğin vâki‘-i hâli mevlânâ-yı merkūm mahallinde ketb u tahrîr edip ba‘dehû ma‘an ba‘s olunan Receb b. Osman ile meclis-i şer‘a gelip haber vemeğin mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ aşer min-Muharremi’l-harâm li-sene mi’e ve elf. Şuhûdü’l-hâl: Salih Bey b. Ali, Ali Çelebi b. Fazlı, Hüseyin Beşe b. Ali, Hızır Efendi, Hüseyin Çelebi b. Mehmed, Receb b. Osman.