İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 186 Hüküm no: 207 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalo bt. Hıristo v. Yani’nin Bahçekapısı’ndaki mumcu dükkanında olan mallarını Politero v. Kostanti’ye satması Mahmiye-i İstanbul’da Yedikule kurbünde Yeni Karaman mahallesinde sâkine Kalo bt. Hıristo v. Yani nâm nasrâniye tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Yiğitbaşı Esteryo v. Yani ve Polharon v. Hıristo nâm zimmîler şehâdetleriyle şer‘an sâbit olan Kiryako v. Yani nâm zimmî meclis-i şer‘-i şerîf-i enverde işbu bâ‘isü’s-sifr Mumcu Politero v. Kostanti nâm zimmî muvâcehesinde bi’l-vekâ[le] ikrâr-ı tâm ve takrîr-i kelâm edip yedimde olan işbu hüküm hücceti nâtık olduğu üzere mahmiye-i mezbûrede Bahçekapısı kurbünde vâki‘ olan mumhânede mevcûd yüz vukıyye mumcu kazganının altmış beş vakıyyesi ve bir yağ mengenesi ve bir kantar ve kefkir ve kepçe ve beş yüz çubuk ve iki tencere ve bir bakır tağar ve sâir âlât-ı lâzıme-i ma‘lûmenin nısfı müvekkilemin ve nısf-ı âharı ve kazgan-ı mezbûrun otuz beş vakıyyesi Zeye v. Dimo nâm zimmînin mülkleri olmağla hâlâ müvekkilem mezbûre mârru’z-zikr kazganda hissesi olan altmış beş vakıyyeyi ve âlât ve sâir eşyâ-i mezkûrede olan nısf hisse-i şâyi‘asını bi-cümleti’t-tevâbi‘ ve’l-levâhık mezbûr Politero’ya bey‘-i bâtt-ı kat‘î ile yüz guruşa bey‘ ve temlîk ve teslîm, ol dahi iştirâ ve tesellüm ve kabûl etdiğinden sonra semeni olan meblağ-ı mezbûr yüz guruşu merkūm Politero yedinden tamâmen ahz u kabz eyledi, ba‘de’l-yevm kazgan-ı mezbûrun altmış beş vakıyyesi ve bi’l-cümle mumhâne-i mezbûrede olan âlât-ı mezbûrenin nısf-ı şâyi‘i mezbûr Politero’nun mülk-i müşterâsı olup müvekkilemin bir vechile alâka ve medhali kalmamışdır dedikde gıbbe’t-tasdîki’l-vicâhî mâ-vaka‘a bi’t-taleb ketb olundu. Fî gurreti Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, Hüseyin b. Mehmed, Mehmed Çelebi b. İdris, Ebûbekir b. Hüseyin, Alekse v. Kosta, Yani v. Yorgaki, Dola v. Hıristo, Kosta v. Yorgi, Yani v. Panayot.