İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 187 Hüküm no: 208 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalo bt. Hıristo v. Yani’nin Yedikule’deki mumcu dükkanında olan mallarını Esteryo v. Todoş’a satması Mahmiye-i İstanbul’da Yedikule kurbünde Yeni Karaman mahallesinde sâkine Kalo bt. Hıristo v. Yani nâm zimmî tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Yiğitbaşı Esteryo v. Yani ve Polharon v. Hıristo nâm zimmîler şehâdetleriyle şer‘an sâbit olan Kiryako v. Yani nâm zimmî meclis-i şer‘-i şerîf-i enverde işbu bâ‘isü’l-vesîka Mumcu Esteryo v. Todoş nâm zimmî muvâcehesinde bi’l-vekâle ikrâr-ı tâm ve takrîr-i kelâm edip yedimde olan işbu hüküm hücceti nâtık olduğu üzere mârrü’l-beyân Yedikule’de vâki‘ Debbâğhâne mumhânesinde mevcûd beynimizde ma‘lûm yüz vukıyye mumcu kazganı nısfı müvekkilemin ve nısf-ı âharı işbu Alekse v. Kosta’nın mülkleri olmağla hâlâ müvekkilem mezbûre mârru’z-zikr mumhânede mevcûd olan kazgan-ı mezbûrede nısf hissesini bey‘-i bâtt-ı kat‘î ile mezbûr Esteryo’ya altı bin beş yüz akçeye bey‘ ve temlîk ve teslîm, ol dahi iştirâ ve tesellüm ve kabûl etdiğinden sonra semeni olan meblağ-ı mezbûr altı bin beş yüz akçeyi müşterî-i merkūm yedinden tamâmen ahz u kabz eyledi, ba‘de’l-yevm mumhâne-i mezbûrede mevcûd olan kazgan-ı mezbûrun nısf hissesi mezbûr Esteryo’nun mülk-i müşterâsı olup müvekkilemin bir vechile alâka ve medhali kalmamışdır dedikde gıbbe’t-tasdîki’l-vicâhî mâ-vaka‘a bi’t-taleb ketb olundu. Fî Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, Hüseyin b. Mehmed, Mehmed Çelebi b. İdris, Ebûbekir b. Hüseyin, Yani v. Panayot, Esteryo v. Yorgi, Yani v. Yorgaki, Kosta v. Yorgi, Dimo v. Hıristo, Polter v. Kostanti ve gayruhüm.