İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 187 Hüküm no: 209 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah’ın kendini boşayan Mehmed b. Ali’den mehir vesair alacaklarını istemesi Mahmiye-i İstanbul’da Yenibahçe kurbünde Karabaş mahallesi sâkinelerinden Fâtıma bt. Abdullah nâm hatun ba‘de’t-ta‘rîfi’ş-şer‘î meclis-i şer‘-i hatîr-i lâzımü’t-tevkīrde zevc-i mutallıkı Mehmed b. Ali nâm kimesne mahzarında üzerine da‘vâ ve takrîr-i kelâm edip mezbûr Mehmed zevcim olup târih-i kitâbdan bir gün mukaddem beni bâyinen tatlîk etmekle zimmetinde mütekarrir ve ma‘kūdün-aleyh yüz seksen akçe mehr-i müeccelimi ve cihet-i karz-ı şer‘îden olan iki yüz kırk akçe hakkımı ve nafaka-i iddet-i mu‘ayyenem ve me’ûnet-i süknâm için ta‘yîn olunan üç yüz akçe ki cem‘an yedi yüz yirmi akçe hakkımı taleb eylediğimde edâdan imtinâ‘ eder, suâl olunup alıverilmesi matlûbumdur dedikde gıbbe’s-suâl mezbûr Mehmed cevâbında müdde‘iye-i mezbûre Fâtıma’ya cihetûn-ı mezkûrûndan yedi yüz yirmi akçe deyni olduğunu tâyi‘an ikrâr u i‘tirâf etmeğin alâ mûceb-i i‘tirâfihî meblağ-ı mezbûr yedi yüz yirmi akçe müdde‘iye-i mezbûre Fâtıma’ya edâ ve teslîm etmek üzere mezbûr Mehmed’e ba‘de’t-tenbîh mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Ali b. Bâli, Mustafa b. Hüseyin, Ebûbekir b. Hüseyin, Abdullah Efendi b. el-Hâc Veli, İbrahim Efendi b. Şaban.