İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 188 Hüküm no: 210 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Kandilci Çavuş’un Sarı Nasuh mahallesindeki evini Murad Ağa b. Abdullah’a satması Mahmiye-i İstanbul’da Sarı Nasuh mahallesinde sâkine olup zâtı ma‘rifet-i şer‘iyye ile ârifân Mehmed Efendi b. eş-Şeyh İbrahim Efendi ve el-Hâc Mehmed Efendi b. Mustafa ta‘rîfleriyle mu‘arrefe olan Âişe bt. el-mahrûm Kandilci Çavuş nâm hatun meclis-i şer‘-i şerîfde bâ‘is-i hâze’l-kitâb fahru’l-akrân Murad Ağa b. Abdullah huzûrunda ikrâr ve takrîr-i kelâm edip babam müteveffâ-yı mezbûr hayâtında yedimde olan hüccet nâtık olduğu üzere bana hibe ve temlîk etmekle mülk-i mevhûbum olup mahalle-i mezbûrede vâki‘ bir tarafdan bazen Hasan Efendi mutasarrıf olduğu vakıf menzil ve bazen Mehmed Efendi mülkü ve bir tarafdan Belkis Hatun mülkü ve bazen İbrahim Efendi Vakfı ve bazen Hadice Hatun mülkü ve tarafeyni tarîk-i âm ile mahdûd dâhiliyede bir fevkānî köşk ve altı bâb fevkānî oda ve iki sofa ve iki dehlîz ve iki mâbeyn odası ve bir kenîf ve iki halvetli bir hamam ve bir câmekân odası ve bir tahtânî kenîf ve bir gün odası ve bir kilâr ve bir matbah ve iki su kuyusu ve bahçe ve bir fırın ve bir taş maslak ve hâ[ri]ciyesi tabaka-i ulyâda dört oda iki sofa ve bir dehlîz ve tabaka-i vustâda dört oda ve dehlîz ve bir kenîf ve süflâda bir anbâr ve bir oda ve bir ahır ve hareme muttasıl bir ahır ve fevkinde bir samanhâne ve bir kenîf ve Defterdâr Ahmed Vakfı’na senede üç yüz altmış akçe mukāta‘ası olan ma‘lûmü’l-mikdâr arsa üzerine mebnî etrâfı camlı ve ortası fıskiyeli bir oda ve bir fevkānî oda bir zîr-i zemîn ve zât-ı eşcâr bahçe ve bir havuz ve bu su kuyusunu müştemil mülk menzilimi cemî‘ tevâbi‘ ve levâhıkıyla mezbûr Murad Ağa’ya tarafeynden îcâb ve kabûlü hâvî bey‘-i kat‘î ile iki yüz altmış beş bin akçeye bey‘ ve teslîm ol dahi iştirâ ve tesellüm etdiğinden sonra semeni olan meblağ-ı mezbûrun bir yük otuz bin akçesini babam müteveffâ-yı mezbûrun merkūm Murad Ağa’ya yüz otuz bin akçe deyni olmağla ona malımdan şer‘an takās edip ol dahi mukāssa ve kabûl eyledi, bâkī yüz otuz beş bin akçesi hâlâ mezbûr Murad Ağa’nın bana zimmetinde deyni kalmışdır, ba‘de’l-yevm menzil-i mezkûr merkūm Murad Ağa’nın mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî evâili Saferi’l-hayr li-sene mi’e ve elf. Şuhûdü’l-hâl: Mehmed Efendi b. İbrahim Efendi, el-Hâc Mehmed Efendi el-İmâm, Hüseyin Ağa b. Mustafa, Abdüsselam Halîfe, Halil b. İbrahim, İbrahim Çelebi el-Müezzin, Ahmed b. Ali, Hasan Ağa b. Ali, el-Hâc Ramazan b. Osman, Yazıcı Mustafa.