İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 189 Hüküm no: 211 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefine reislerinden Agoş v. İlya’nın gemisini kiralayan Tercüman Yorgo v. Ashaki’den alacaklı olduğu iddiası Sefîne reislerinden olup Kapıdağı nâhiyesine tâbi‘ Mihanya nâm karye sükkânından Agoş v. İlya nâm zimmî meclis-i şer‘-i şerîfde işbu bâ‘isü’l-vesîka mahrûse-i Galata’da ( ) mahallesinde sâkin Tercüman Yorgo v. Ashaki muvâcehesinde üzerine da‘vâ ve takrîr-i kelâm edip târih-i kitâbdan bir sene mukaddem benimle işbu hâzır bi’l-meclis Yani v. Todori beynimizde müşterek çenber ta‘bîr olunur sefînemizi Marmara Adası’ndan Galata’ya getirmek üzere hamr tahmîl için ben mezbûr Tercüman Yorgo’ya dört yüz guruşa îcâr ve teslîm ve iki ay mikdârı eğlenmek üzere kavl edip ol dahi istîcâr ve kabûl ve benimle ma‘an Marmara Adası’na vardıkda beş ay mikdârı eğlen[dik]den sonra hamr tahmîl edip ve mahrûse-i Galata’ya gelip sefîneyi tahliye eyledikde sen sefînemizi kavlimizden üç ay ziyâde avk etdirdin deyü müddet-i mezbûrenin ecr-i mislini taleb eylediğimde mezbûr Yorgo dahi ücret-i mezbûreye yüz guruş dahi zam edip min haysü’l-mecmû‘ beş yüz guruş vermek üzere râzî oldukdan sonra meblağ-ı mezbûrun ancak dört yüz guruşunu bana edâ ve teslîm ben dahi ahz u kabz edip yüz guruş dahi zimmetinde bâkī kalmağla hâlâ taleb ederim, suâl olunsun dedikde gıbbe’s-suâl mezbûr Yorgo cevâbında ziyâde-i mezbûreyi inkâr etdiğinden mâ‘adâ bundan akdem müdde‘î-i mezbûrdan ber-vech-i mübeyyen istîcâr eylediğim sefîne-i mezbûrenin ücreti olan meblağ-ı mezbûr dört yüz guruşu müdde‘î-i mezbûr Aguş’a mahrûse-i Galata’da edâ ve teslîm ol dahi ahz u kabz eyledikde sefîne-i mezbûre ve ücretine ve bi’l-cümle husûs-ı mezbûra müte‘allika âmme-i da‘vâdan mezbûr Agoş benim zimmetimi ibrâ-i âm ile ibrâ ve ıskāt eyledi deyü def‘le mukābele edicek, gıbbe’l-istintâk ve’l-inkâr mezbûr Yorgo’dan def‘-i mezbûruna muvâfık beyyine taleb olundukda mahrûse-i mezbûrede Ağa Câmi‘i mahallesinde sâkin Hüseyin Çelebi b. Mehmed ve Osman Çelebi b. Abdullah nâm kimesneler ve Vasilaki v. Ergiri nâm zimmî li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ bundan akdem mezbûr Yorgo müdde‘î-i mezbûr Aguş’dan ber-vech-i mübeyyen istîcâr eylediği sefîne-i mezbûrenin ücreti olan meblağ-ı mezbûr dört yüz guruşu mezbûr Aguş’a mahrûse-i Galata’da edâ ve teslîm, ol dahi ahz u kabz eyledikde sefîne-i mezbûre ve ücretine ve bi’l-cümle husûs-ı mezbûra müte‘allika âmme-i da‘vâdan bizim huzûrumuzda mezbûr Aguş müste’cir-i merkūm Yorgo’nun zimmetini ibrâ-i âmla ibrâ ve ıskāt eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr Aguş bî-vech mu‘ârazadan men‘ olundu, mâ-vaka‘a bi’t-taleb ketb olundu. Fi’l-yevmi’s-sâdis min-Saferi’l-hayr li-sene mi’e ve elf. Şuhûdü’l-hâl: Mustafa Çavuş b. Abdullah el-Mübâşir, Abdurrahman b. Abdullah, Ali Çelebi, İbrahim Çelebi b. Ahmed, Ebûbekir b. Hüseyin, Ali [b.] Bâli.