İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 190 Hüküm no: 212 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Bey b. Abdullah’a olan borcundan dolayı hapiste olan Şerife Emetullah bt. Ali Efendi’nin serbest bırakılmasına dair mahalle halkının beyanı Mahmiye-i İstanbul’da Haraççı İshak Bey mahallesinde sâkine ve mukaddemâ âhar düyûn-ı müsbetesi için müddet-i medîde habs olunup ve hâlâ işbu hâzır bi’l-meclis Süleyman Bey b. Abdullah nâm kimesneye cihet-i karzdan bin beş yüz akçe deyni için mahmiye-i mezbûrede Sicn-i Sultânî’de mahbûse olan Şerife Emetullah bt. Ali Efendi nâm hâtûndan ber-vech-i âtî istişhâd-ı şer‘î sudûrundan sonra mahalle-i mezbûre sükkânından olup mezbûrenin zâtını ma‘rifet-i şer‘iyye ile ârifûn İmâm Abdullah Efendi ve Abdulbâki Çelebi b. Hüseyin ve Musa Çelebi b. Abdullah ve Halil Çelebi b. İbrahim ve Hüseyin Efendi b. Mehmed el-Müezzin ve Ahmed Bey b. Süleyman nâm kimesneler meclis-i şer‘a hâzırûn olup şöyle edâ-i şehâdet eylediler ki fi’l-vâki‘ işbu medyûne-i mezbûre Emetullah Hatun hâlâ üzerinde lâbise olduğu işbu köhne libâsından gayrı bir şeye mâlik değildir ve deyn-i mezbûru bir vechile edâya iktidârı yokdur, müflise ve mu‘dimedir, biz bu husûsa bu vech üzere şâhidleriz, şehâdet dahi ederiz deyü her biri dâyin-i mezbûrun muvâcehesinde edâ-i şehâdet edip ve dâyin-i mezbûr Süleyman Bey’in medyûne-i mezbûrenin yesârına beyyinesi olmamağla bâ-fermân-ı âlî vüs‘at-i hâl ve kudret-i mâlına değin mezbûre Şerife Hatun habsden ıtlâk olunmak üzere cânib-i şer‘-i şerîfden işbu vesîka bi’t-taleb ketb olundu. Fi’l-yevmi’t-tâsi‘ min-Saferi’l-hayr li-sene mi’e ve elf. Şuhûdü’l-hâl: es-Seyyid Hasan Çelebi b. es-Seyyid Hasan, Ahmed Ağa b. Musa, Abdullah Efendi b. Halil, Mustafa Ağa Sermuhzırân.