İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 190 Hüküm no: 213 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcunu ödememesinden dolayı hapsolunan Mehmed b. İlyas’ın iflasına karar verilmesi Fi’l-asl vilâyet-i Anadolu’da kasaba-i İskilip ahâlîsinden olup gāibûn ani’l-meclis Abdülkādir Beşe b. Ömer ve Receb Beşe b. Danyel ve Ali Beşe b. Ömer nâm kimesnelere bedel-i sulhdan iki yüz elli dörd guruş için dört aydan berü Sicn-i Sultâni’de mahbûs olan Mehmed b. İlyas’ın keyfiyet-i hâli vukūfu olan müslimînden suâl olunup iflâsı sâbit ve zâhir olursa yedine hüccet-i şer‘iyye verile deyü fermân-ı âlî sâdır olmağla imtisâlen lehû mezbûr Mehmed’den vech-i âtî üzere istişhâd-ı şer‘î sudûrundan sonra udûl-i müslimînden ve fi’l-asl kasaba-i mezbûreden olup hâlâ mahmiye-i İstanbul’da Hoca Dursun odalarında sâkin İbrahim b. Şaban ve Hüseyin b. İbrahim ve Mustafa b. Mehmed li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müsted‘î-i mezbûr Mehmed’in üzerinde lâbis olduğu köhne libâsından mâ‘adâ mâl ıtlâk olunur nesnesi olmayıp müflis ve mu‘dim olmağın mezbûr Mehmed’in kudret-i mâl [ve] vüs‘at-i hâle vusûlüne değin hapisden ıtlâk olunup imhâl ve sebîlî tahliye olunması lâzımdır, biz bu husûsa bu vech üzere şâhidleriz, şehâdet dahi ederiz deyü her biri gāibûn-ı mezbûrûnun vekîl-i şer‘îleri olan Cafer b. el-Hâc Abdülkādir muvâcehesinde edâ-yı şehâdet-i şer‘iyye eylediklerinde mezbûr Mehmed’in yesârına vekîl-i mezbûrun beyyinesi olmamağla gıbbe’t-tezkiye şehâdetleri makbûle olmağın mûcebiyle mezbûr Mehmed’in iflâsına ba‘de’l-hükm mezbûr Mehmed’in nefs-i Galata’da Sultan Bâyezid mahallesinde sâkin Durak Bey Kapudanı İbrahim Kapudan b. Abdullah ve Tavukpazarı’nda sâkin Boyacı Süleyman b. Mustafa kefîl olmağın mâ-hüve’l-vâki‘bi’t-taleb ketb olundu. Fi’l-yevmi’l-âşir min-Saferi’l-hayr li-sene mi’e ve elf Şuhûdü’l-hâl: Çorbacızâde Mehmed Beşe el-Mübâşir, Mehmed Beşe b. Ahmed el-Mübâşir, Ahmed Beşe b. Timur el-Mübâşir, İbrahim Çelebi b. Ahmed, Siyavuş b. Abdullah.