İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 191 Hüküm no: 214 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukurhan’da misafir Yusuf Kapudan b. Abdullah’ın Hacı Ahmed b. Ali ile ortağı Hüseyin b. Abdullah’da olan alacağını tahsil etmesi Mahmiye-i İstanbul’da Çukurhan’da misâferet vechi üzere sâkin Yusuf Kapudan b. Abdullah nâm kimesne meclis-i şer‘-i şerîf-i enverde kendi tarafından asıl ve şerîki olup fevt olan el-Hâc Ahmed b. Ali’nin sagīr oğulları Ali ve Abdullah’ın tesviye-i emirleri için savb-ı şer‘den mansûb vasîsi olan el-Hâc Hüseyin b. Abdullah mahzarında ikrâr-ı tâm ve takrîr-i kelâm edip müteveffâ-yı mezbûr ile şerîki mezbûr Hüseyin (mahzarında ikrâr-ı tâm ve takrîr-i kelâm edip müteveffâ-yı mezbûr ile şerîki mezbûr Hüseyin b. Abdullah) yedlerinde bi-tarîki’l-emâne o[r]ta boylu tüfenk ve bir seccâde ve bir filandıra ve üç bıçak ve bir gaddâre ve iki çift üzengi ve bir kırmızı diktik ve bir havan eli ve bir at baltası ve iki tuç saçma ve bir inek ve kahve bahâsı olan seksen guruş olduğun iddi‘â ve muvâcehelerinde şuhûd-i udûl ile isbât edip hükm-i şer‘î lâhık olmuşidi. El-hâletü hâzihî eşyâ-yı mezkûr ile meblağ-ı mezbûrun nısfı müteveffâ-yı mezbûr mâlından ve nısf-ı âharı mezbûr el-Hâc Hüseyin mâlından olmak üzere bana teslîm ben dahi ahz u kabz ve tesellüm edip husûs-ı mezbûra müte‘allik âmme-i da‘vâdan mezbûr el-Hâc Hüseyin ile müteveffâ-yı mezbûrun veresesini ibrâ vü ıskāt eyledim, ba‘de’l-yevm her birimizin âhar ile da‘vâ ve nizâ‘ımız kalmadı dedikde gıbbe’t-tasdîki’l-mu‘teberi’l-vicâhî mâ-vaka‘a bi’t-taleb ketb olundu. Fi’l-yevmi’l-âşir min-Saferi’l-hayr li-sene mi’e ve elf Şuhûdü’l-hâl: İbrahim Çelebi b. Ahmed, Mustafa Himmet b. Ahmed, Ebûbekir b. Hüseyin, el-Hâc Mehmed b. Abdullah, Süleyman Çelebi b. Sinan, el-Hâc Mehmed b. Hud? ve gayr[uhum].