İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 192 Hüküm no: 215 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. Ahmed’in Manolaki v. Velüt aleyhindeki alacak davasının sulh ile neticelenmesi Mahmiye-i İstanbul’da Ali Paşa-yı Atîk mahallesinde sâkin Hüseyin Efendi b. Ahmed meclis-i şer‘-i şerîf-i enverde işbu bâ‘isü’l-vesîka Manolaki v. Delon nâm zimmî muvâcehesinde ikrâr-ı tâm ve takrîr-i kelâm edip mezbûr Manolaki bir mikdâr zamân sefînemde reis olmağla târîh-i kitâba gelince etdiği seferlerden hâsıl navuldan hesâbımız gördüğümde ba‘de külli’l-hesâb merkūma âid elli guruşu taleb eylediğimde meblağ-ı mezbûru vekîl eylediğim Ahmed Bey’e teslîm eylemek üzere def‘a mütesaddî olup ol vechile beynimizde münâza‘ât-ı kesîre cereyân etmişdi, el-hâletü hâzihî vesâtat-ı muslihîn ile mezkûr Manolaki da‘vâ-yı mezkûrumdan beni yirmi guruş üzerine sulh eylediğinde ben dahi sulh-i mezbûru kabûl ve bedel-i sulh olan meblağ-ı mezbûru yirmi guruşu alıp kabz edip husûs-ı mezbûra müte‘allika cemî‘ da‘vâdan her birimiz âharı ibrâ vü ıskāt eyledik min ba‘d da‘vâ ve nizâ‘ımız kalmadı dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’s-sâmin min-Saferi’l-hayr li-sene mi’e ve elf Şuhûdü’l-hâl: Ahmed Çelebi b. Ebûbekir, İbrahim Çelebi b. Ahmed, Ebûbekir b. Hüseyin.