İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 193 Hüküm no: 217 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horsihoğlu Kostantin v. Mıgırdıç’ın Şeyh Sinan Erdebilî Vakfı’ndan aldığı borca karşılık bağlarını rehin etmesi Vilâyet-i Anadolu’da Eğin kazâsına tâbi‘ Kemerkâb nâm karye sükkânından Horsihoğlu dimekle şehîr Kostantini v. Mıgırdıç nâm Ermeni meclis-i şer‘-i şerîf-i enverde Ayasofya-i kebîr kurbünde vâki‘ Şeyh Sinan Erdebilî Zâviyesi Evkāfı’ndan Ahmed Efendi ve Fehmi Efendi vakıflarına mütevellî olan Şeyh Mehmed Efendi b. Ahmed tarafından vekil-i müsecceli olan Mustafa Efendi b. Mehmed mahzarında ikrâr ve takrîr-i kelâm edip bin doksan sekiz senesi Muharremü’l-harâmı gurresinde zikr olunan Ahmed Efendi Vakfı’ndan yüz elli guruş ve Fehmi Efendi Vakfı’ndan iki yüz guruş ve Dede Ali Ağa Vakfı’ndan yüz guruş ki cem‘an dört yüz elli guruş istidâne ve mukābelesinde karye-i mezbûrede vâki‘ bir tarafı Ümid v. Aleksan bağı ve iki tarafı Arno mülkü ve bir tarafı tarîk-i âm ile mahdûd bir kıt‘a mülk bağ ve yine derebağı dimekle ma‘rûf bir tarafı Arakil mülkü ve bir tarafı Ahmed mülkü ve bir tarafı çeşme ve bir tarafı dere vâdîleriyle mahdûd bir kıt‘a mülk bağımı bi-tarîki’l-istiğlâl rehin vaz‘ ve teslîm etmişidim. El-hâletü hâzihî deyn-i mesfûrun devr-i şer‘î ile iltizâm eylediğimiz murâbaha-i şer‘iyyesi vakıf için mütevellî-i mezbûra edâ ve teslîm ol dahi ahz u kabz ve tesellüm edip asl-ı mâl olan dört yüz elli guruş evkāf-ı mezkûreye zimmetimde lâzımü’l-edâ ve vâcibü’l-kazâ deynim olup meblağ-ı mezbûru târîh-i kitâbdan dört ay tamâmında edâ ve teslîm etmezsem mârru’z-zikr bağlarımı semen-i misilleriyle âhara bey‘ ve kabz-ı semene ve semen-i mezbûrdan deyn-i mezkûru edâ ve fazla kalırsa bana îsâle ve husûs-ı mezbûr mütevakkıf olduğu umûrun küllîsine yine mezbûr Mustafa Efendi’yi tarafımdan vekîl ve küllemâ azeltüke fe-ente vekîlî mazmûnu üzere devriye ile nâib-i menâb nasb u ta‘yîn eyledim, ol dahi vekâlet-i mezbûreyi kabûl eyledi dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’l-âşir min-Saferi’l-hayr li-sene mi’e ve elf Şuhûdü’l-hâl: Mustafa b. Ahmed, Ali Efendi, Şaban Dede b. ( ), Hasan Efendi, Ahmed Bey el-Cündî ve gayruhum.