İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 194 Hüküm no: 219 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. el-Hac Süleyman’ın Macar asıllı kölesi Bektaş’ı mahkeme kararıyla azat edilmesi Açık kaşlı sarı elâ gözlü, orta boylu, Macariyyetü’l-asl zikri âtî da‘vâya kıbel-i şer‘den me’zûn hâmiletü’l-vesîka Bektaş b[t.] [Abd]ullahmeclis-i şer‘-i şerîfde kendüye rık olmak üzere vâzı‘atü’l-yed olan mahmiye-i İstanbul’da Kapı? kurbünde Tavâsî Süleyman Ağa mahallesinde sâkine Saliha bt. el-Hâc Hüseyin nâm hâtûnun vekil-i müsecceli olan Mehmed b. Ahmed mahzarında üzerine da‘vâ ve takrîr-i kelâm edip ben mezbûre Saliha Hâtûn’un câriye-i memlûkesi olup mezbûre Saliha Hatun altı ay mukaddem beni mâlından tahrîr ve i‘tâk edip ben sâir harâir-i asliyyât gibi hürre olmuş iken hâlâ bana rık olmak üzere vaz‘-ı yed eder, suâl olunup sebîlim tahliye olunması matlûbumdur dedikde gıbbe’s-suâl mezbûr Mehmed cevâbında fi’l-hakīka müvekkile-i mezbûre mevsûf-ı mezbûreye vaz‘-ı yedini ikrâr lâkin mezbûreyi ıtkını inkâr edicek müdde‘iye-i mezbûrdan müdde‘âsına beyyine taleb olundukda zât-ı mezbûreyi ma‘rifet-i şer‘iyye ile ârifân olup yine mahalle-i mezbûrede sâkin İmam Hasan Efendi b. Eyüb ve Mehmed Bey b. Ahmed ve Osman Çelebi b. Abdurrahman ve Eyüb Çelebi b. Mehmed nâm kimesneler li-ecli’ş-şehâde meclis-i şer‘de hâzırûn olup isre’l-istişhâd fi’l-vâki‘ mahalle-i mezbûrede sâkine olup işbu müdde‘iye-i mezbûrenin mevlâsı merkūme Saliha bt. el-Hâc Hüseyin b. Abdullah târîh-i mezbûrda bizim huzûrumuzda merkūme Bektaş’ı tahrîr ve i‘tâk etmişidi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde [46a] gıbbe’t-ta‘dîl ve’t-tezkiye şehâdetleri makbûle olmağın mûcebiyle mezbûrenin ıtkına ba‘de’l-hükm mâ-vaka‘a bi’t-taleb ketb olundu. Fi’l-yevmi’l-âşir min-Saferi’l-hayr li-sene mi’e ve elf Şuhûdü’l-hâl: Nakkâş Hüseyin Çelebi, el-Hâc Hüseyin b. İbrahim, Halil b. Ahmed, Ali Beşe b. Bâli