İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 204 Hüküm no: 231 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğin’in Apçağa köyü halkından vefât eden Avasib v. Mendovak’ın el-Hac Hasan ve İsmail’e olan borçlarının ödenmesi ve alacağının tahsil edilmesi Fi’l-asl vilâyet-i Anadolu’da Eğin kazâsında Apçağa nâm karye ahâlisinden olup Ekmekçi tâifesinden olmağla Sofya’da hâlike olan Avasim v. Mendovak’ın mecmû-ı terekesi düyûnu için vâfî olmağla terekesin kabz ve düyûnunu edâya bir kayyim nasb u ta‘yîn olunmak lâzım ve mühim verese-i hâlik-i mezbûrun kebîr oğlu Sahak nâm Ermeni her vechile mahal olmağla hâkim-i muvakkı‘u’l-kitâb tûbâ lehû ve hüsnü me‘âb hazretleri mezkûr Sahak’ı husûs-ı mezbûra kayyim nasb u ta‘yîn etdikde ol dahi kabûl ve merâsimin edâya ta‘ahhüd etdikden sonra mezbûr Sahak meclis-i şer‘de el-Hâc İbrahim b. Mustafa mahzarında takrîr-i kelâm ve ta‘bîr ani’l-merâm edip hâlik-i mezbûrun mecmû‘-ı terekesi otuz altı bin üç yüz akçe ile el-Hâc Süleyman nâm kimesne zimmetinde emânet olan yedi bin akçe ki cem‘an kırk üç bin üç yüz akçeye bâliğ ve meblağ-ı mezbûru emânet bi’l-ahz mezkûr el-Hâc İbrahim vaz‘-ı yed eyledikden sonra işbu hâzırân bi’l-meclis el-Hâc Hasan ve İsmail nâm kimesneler mezbûr Avasib zimmetinde buğday bahâsından otuz altı bin üç yüz akçe ve mezbûr el-Hâc İbrahim’in cihet-i mezkûreden dokuz bin dört yüz sekiz akçe hakları olduğun her biri şuhûd-ı udûlle isbât edip ba‘de’t-tahlîfi’ş-şer‘î terekesinden edâ olunmak üzere hükm olunup hüccet-i şer‘iyye verilmekle meblağayn-ı mezbûreyn cem‘an kırk bir bin sekiz yüz seksen akçe mezbûrûna edâ ve teslîm olunup bâkī bin sekiz yüz doksan iki akçeyi mezkûr el-Hâc İbrahim yedinden bi’l-izni’ş-şer‘î kabz ve teslîm eyledim, min ba‘d tereke-i hâlik-i mezbûrdan mezkûr el-Hâc İbrahim yedinde ve zimmetinde bir akçe ve bir habbe kalmamışdır dedikde gıbbe’t-tasdîki’l-vicâhî mâ-vaka‘a bi’t-taleb ketb olundu. Fi’l-yevmi’s-sânî min-Saferi’l-hayr li-sene mi’e ve elf. Şuhûdü’l-hâl: Salih Efendi b. Mehmed, Salih b. Mehmed, el-Hâc Mehmed b. Ali, el-Hâc Ebûbekir, Ebûbekir Çelebi b. Hüseyin, İbrahim Çelebi b. Ahmed.