İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 205 Hüküm no: 232 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın boşandığı eşi Ali b. Ahmed’de olan nafaka bedelini tahsil etmesi Mahmiye-i İstanbul’da Mustafa Paşa Çarşısı kurbünde Mollâ Hüsrev mahallesi sâkinelerinden Âişe bt. Abdullah nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i mutallıkı bâ‘is-i hâze’l-kitâb Ali b. Ahmed nâm kimesne mahzarında ikrâr-ı tâm ve takrîr-i kelâm edip mezbûr Ali bundan akdem beni tatlîk etmekle zimmetinde mütekarrir ve ma‘kūdün-aleyh olan beş yüz akçe mehr-i müeccelimi ol vakitde bana def‘ u teslîm edip ben dahi ahz etdiğimden sonra zimmetinde nafaka-i iddet-i mu‘ayyenem bâkī kalmışdı, halâ nafaka-i mu‘ayyenem için dahi üç yüz akçe, bir yaşmağı ve bir makreme verip ba‘de’l-yevm mezbûr Ali’nin yedinde ve zimmetinde hukuk-ı zevciyyete müte‘allika bir akçe ve bir habbe hakkım kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb [olundu.] Fi’l-yevmi’t-tâsi‘ min-Saferi’l-hayr li-sene mi’e ve elf. Şuhûdü’l-hâl: Receb b. Ahmed, Murad Beşe b. Yusuf, Ali b. Abdullah, Mehmed b. Abdullah ve gayruhum.