İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 205 Hüküm no: 233 Orijinal metin no: [49a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kulak Ali Beşe b. Receb’in Sabiha bt. Mehmed’de, köle bedelinden olan alacağının tahsil edilmesi Mahmiye-i İstanbul’da Neslişahsultan mahallesinde sâkin esirci tâifesinden Kulak Ali Beşe b. Receb meclis-i şer‘-i şerîf-i enverde işbu bâ‘isetü’l-kitâb mahmiye-i mezbûrede el-Hâc Hasanzâde mahallesinde sâkine Sabiha bt. Mehmed nâm hatun mahzarında ikrâr-ı tâm ve takrîr-i kelâm edip mezbûre Saliha zimmetinde benden iştirâ ve teslîm eylediği orta boylu, açık kaşlı, kara gözlü Rusiyyetü’l-asl Şahbaz bt. Abdullah nâm câriye-i memlûkem bahâsından yüz elli esedî guruş hakkım olup hattâ meblağ-ı mezbûru ba‘de’d-da‘vâ edâ etmek üzere hükm ve hüccet-i şer‘iyye tahrîr olunmuşidi. El-hâletü hâzihî mezbûre Saliha meblağ-ı mezbûr yüz elli esedî guruşu bana edâ ve teslîm ben dahi ahz u kabz ve tesellüm eyledim, meblağ-ı mezbûrdan bir akçe ve bir habbe hakkım kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî evâsıtı Saferi’l-hayr li-sene mi’e ve elf. Şuhûdü’l-hâl: Hasan Çelebi b. Fazlullah, Ekmekçi Ali b. İbrahim Çelebi b. Ahmed, Ebûbekir b. Hüseyin, Mehmed b. Ahmed, Ali b. Bâli, Abdi el-Muhzır.